„Frammistaðan var bara góð, miðað við aðstæður." Sagði Brynjar Björn Gunnarsson aðstoðarþjálfari Fylkis eftir að liðið hans tapaði 1-0 gegn KR í kvöld.
Lestu um leikinn: Fylkir 0 - 1 KR
„Eftir að hafa fengið mark á sig snemma, og missa síðan leikmann útaf einhverju korteri seinna. Þá var frammistaðan fín. Full ódýrt fannst mér markið sem við fáum á okkur eftir horn. Frá því og fram að því sem við missum mann útaf þá ógnuðum við upp kantana og komumst í ágætis stöður, við náðum bara ekki að skapa nógu góð færi. Í heildina þurfum við bara að sætta okkur við þessa frammistöðu, úrslitin skipta kannski ekki öllu máli fyrir okkur. Þetta hefði getað farið illa líka ef við hefðum farið að slaka á eitthvað."
Árni Freyr Guðnason hefur verið ráðinn þjáfari Fylkis. Hann mun þó ekki taka við liðinu fyrr en eftir tímabil og mikið hefur verið rætt um hvort Brynjar muni vera hluti af hans teymi.
„Nei það hefur ekki verið rætt við mig um að vera aðstoðarmaður hans, alls ekki. Ég kem hingað á þeim forsendum á að vera með í þessu með Rúnari, það var líka af því að við Rúnar höfum unnið saman áður og við þekkjumst vel og erum góðir félagar. Það er þannig sem þetta æxlast. Ef einhver annar en Rúnar hefði verið hérna þá er ég ekkert viss um að þetta hefði gerst. Við gerðum okkar besta í að halda liðinu uppi og ná nógu mikið af úrslitum inn, það því miður tókst ekki. Þannig staðan mín er óbreytt, ég hætti hérna eftir tímabilið, svo sjáum við bara hvað kemur í kjölfarið."
Viðtalið má sjá í heild sinni í spilaranum hér fyrir ofan.
