Spá þjálfara í 2. deild: 9. sæti

Spáin:
1.
2.
3.
4.
5.
6.
7.
8.
9. Ægir, 56 stig
10. KFG, 39 stig
11. Víðir, 33 stig
12. Kormákur/Hvöt, 16 stig

9. Ægir
Eftir að hafa fallið úr Lengjudeildinni sumarið áður, þá náði Ægir ekki miklu flugi í 2. deild í fyrra. Þeir byrjuðu reyndar vel og voru í öðru sæti eftir fimm leiki en svo fór loftið úr blöðrunni ef svo má segja. Á einum tímapunkti tapaði liðið sjö leikjum úr röð og missti af öllu því sem kallast toppbarátta. Uppgangur Ægismanna var hraður áður en kom að síðasta sumri. Liðið var í 4. deild sumarið 2019 og í neðri hluta 3. deild sumarið 2020. Svo komst liðið í Lengjudeildina fyrir sumarið 2023 og þetta var kannski of mikið, of fljótt. Í fyrra tók Ægir skref til baka í fyrsta sinn í langan tíma og ef spáin rætist í sumar þá gera þeir það aftur núna en það er væntanlega ekki markmiðið í Þorlákshöfn.

Þjálfarinn: Nenad Zivanovic er þjálfari Ægis og hefur verið það frá árinu 2019. Þá var liðið í 4. deild en undir hans stjórn hefur Ægir klifrað upp deildirnar, allt þar til 2023 þegar Ægismenn féllu úr Lengjudeildinni. Eftir sumarið 2023 þá skrifaði Nenad undir nýjan tveggja ára samning sem gildir út yfirstandandi tímabil. Nenad er frá Serbíu og er fæddur 1976, en hann átti farsælan feril sem leikmaður í heimalandinu, í Færeyjum og ekki síst hér á Íslandi. Hann spilaði með Breiðabliki en einnig með Fjarðabyggð og Þór. Aðstoðarmaður hans er Arnar Logi Sveinsson, en hann tók við því starfi í fyrra.

Stóra spurningin: Ná þeir að rísa aftur upp?
Það kom högg í verkefnið hjá Þorlákshafnarfélaginu í fyrra er liðið endaði í áttunda sæti 2. deildar. Þetta hafði eiginlega einungis verið upp á við þar áður þar sem þeir flugu upp deildirnar. Núna er spurningin hvernig liðið dílar við verkefnið eftir svona frekar erfitt sumar í fyrra. Ná þeir að koma sér aftur í toppbaráttuna eða verður þetta aftur erfitt. Ná Ægismenn að rífa sig upp eftir mótlætið? Það er verkefni fyrir þjálfarann sem hefur verið þarna í langan tíma að finna aftur réttu blönduna.

Grasrótin er nýr hlaðvarpsþáttur sem fjallar alfarið um neðri deildirnar á Íslandi. Þeir velja tvo lykilmenn og einn sem gaman verður að fylgjast með úr hverju liði í 2. deild karla.

Lykilmenn: Jordan Adeyemo og Stefan Dabetic
Ægismenn náðu í Jordan Adeyemo, þennan öfluga framherja, í vetur. Hann hefur verið að spila í fyrstu deild á Írlandi. Á undirbúningstímabilinu skoraði hann tíu mörk í sex leikjum, því verður mjög gaman að sjá hvað hann setur mörg í sumar. Stefan Dabetic er búinn að vera hjá Ægi síðan 2019. Spilaði flestar mínútur hjá liðinu í fyrra og er ómissandi fyrir liðið. Hann er hávaxinn og sterkur hafsent frá Serbíu.

Gaman að fylgjast með: Aron Daníel Arnalds
Leikmaður sem hefur verið á flakki um neðri deildirnar. Er hraður kantari sem getur skorað. Ef hann fær traustið í sumar gæti hann sprungið út.

Komnir:
Aleksa Ivanovic frá Serbíu
Andi Morina frá Þrótti R.
Andrew Butsuwan frá Stokkseyri
Baptiste Gateau frá Bandaríkjunum
Daníel Karl Þrastarson frá Þrótti R. (Á láni)
Einar Breki Sverrisson frá Selfossi (Á láni)
Ivan Rodrigo Moran Blanco frá Víkingi Ó.
Ísak Aron Ómarsson frá HK (Á láni)
Jordan Adeyemo frá Írlandi
Jón Jökull Þráinsson frá Stokkseyri
Sigurður Óli Guðjónsson frá Árborg

Farnir:
Anton Fannar Kjartansson í Leikni R.
Arilíus Óskarsson í Stokkseyri
Ágúst Karel Magnússon í Þrótt R. (Var á láni)
Emil Ásgeir Emilsson í Elliða
Geoffrey Wynton Mandelano Castillion til Hollands
Sindri Björn Hjaltested í Víking R. (Var á láni)
Toma Ivov Ouchagelov til Búlgaríu

Þjálfarinn segir - Nenad Zivanovic
Eftir úrslitin í Lengjubikarnum, þar sem við komumst ekki upp úr riðlinum, og eftir úrslitin í Mjólkurbikarnum þá skil ég alveg að þjálfararnir spái okkur níunda sæti. Þetta er erfitt þegar það tekur langan tíma fyrir liðið að koma saman. Við vorum ekki komnir með leikmannahópinn saman eftir áramót og náðum ekki að spila okkur saman í æfingaleikjum. Og það gerir okkur erfitt fyrir núna þegar deildin byrjar. Frá því við spáðum og þangað til núna, þá höfum við fengið inn fjóra leikmenn sem styrkja liðið mjög mikið. Ef við fáum ákveðna heppni, sem er nauðsynleg, og ef leikmennirnir ná að undirbúa sig vel, kynnast hvor öðrum vel, kynnast kerfinu og okkar leik, og sleppa við meiðsli þá er mögulegt að við verðum í baráttu um toppinn sem er alltaf markmið Ægis. Það hefur verið þannig síðustu ár að liðum sem er spáð neðstu sætunum tekst stundum að komast upp um deild og það er alls ómögulegt fyrir okkur."

Fyrstu þrír leikir Ægis:
2. maí, KFG - Ægir (Samsungvöllurinn)
10. maí, Ægir - KFA (GeoSalmo völlurinn)
17. maí, Ægir - Kormákur/Hvöt (GeoSalmo völlurinn)