| fim 24.apr 2025 17:30 Mynd: Fótbolti.net - Hafliði Breiðfjörð |
|
Spá þjálfara í 2. deild: 11. sæti
Fótbolti.net kynnir liðin sem leika í 2. deild í sumar eitt af öðru eftir því hvar þeim er spáð. Við fengum alla þjálfara liðanna í deildinni til að spá fyrir sumarið og fengu liðin því stig frá 1-11 eftir því en ekki var hægt að spá fyrir sínu eigin liði. Í næst neðsta sæti í spánni er Víðir Garði.
Víðismönnum er spáð 11. sæti.
Sveinn Þór Steingrímsson er þjálfari Víðis.
Markús Máni fann sig vel í Víðisliðinu í fyrra.
Joaquin Ketlun er fyrirliði Víðis.
Kristófer Snær Jóhannsson, leikmaður til að fylgjast með.
Hvað gera Víðismenn í sumar?
1.
2.
3.
4.
5.
6.
7.
8.
9.
10.
11. Víðir, 33 stig
12. Kormákur/Hvöt, 16 stig
11. Víðir Garði
Eftir harða baráttu í 3. deildinni þá flugu Víðismenn loksins upp um deild í fyrra eftir að hafa verið í fjögur ár í fjórðu efstu deild. Þeir enduðu með jafnmörg stig og Árbær sem var í þriðja sæti en fóru upp á mun betri markatölu. Nú verður gaman að sjá hvernig gengur að taka skrefið upp á við. Víðir lék síðast í 2. deild á Covid tímabilinu 2020 og féllu þá á meðalfjölda stiga en þeir voru með stigi minna en Völsungur þegar deildin var stöðvuð. Núna er Völsungur í Lengjudeildinni á meðan þeir í Garðinum þurftu að harka í 3. deild í nokkur ár. Svona getur fótboltinn verið en þetta hefur eflaust skilið smá blóðbragð eftir í munninum á Víði og spurning hvort þeir geti eitthvað nýtt sér það í sumar þegar þeir taka stökkið aftur upp. Þess má til gamans geta að Víðir var fyrsti sigurvegari Fótbolti.net bikarsins.
Þjálfarinn: Sveinn Þór Steingrímsson stýrir skútunni hjá Víði en hann er núna á leið inn í sitt þriðja tímabil sem þjálfari liðsins. Víðismenn hafa tekið skref upp á við hvert einasta sumar undir hans stjórn og það gerist líka í sumar, sama hvernig deildin endar. Sveinn spilaði sem leikmaður með Grindavík, Njarðvík, GG, Hamri, Þrótti Vogum, Magna og Dalvík/Reyni. Nánast öllum liðum á Suðurnesjum nema Víði. Hann hóf þjálfaraferil sinn í meistaraflokki á því að stýra Dalvík/Reyni og tók svo við Magna í næst efstu deild. Hann stýrði Magna Grenivík til 2022 þegar hann tók svo við Víði.
Stóra spurningin: Ná þeir að taka gott gengi með í sumarið?
Víðismenn hafa leikið mjög vel á undirbúningstímabilinu og unnu sinn riðil í B-deild Lengjubikarsins. Þeir mættu Kára frá Akranesi í undanúrslitunum og unnu þann leik í vítaspyrnukeppni. Víðismenn munu mæta Hetti/Hugin í úrslitaleik B-deildar Lengjubikarsins og það er spurning hvort þeir nái að taka þetta góða gengi með inn í sumar. Miðað við undirbúningstímabilið þá virðast menn vera tilbúnir að taka skrefið upp á við.
Grasrótin er nýr hlaðvarpsþáttur sem fjallar alfarið um neðri deildirnar á Íslandi. Þeir velja tvo lykilmenn og einn sem gaman verður að fylgjast með úr hverju liði í 2. deild karla.
Lykilmenn: Markús Máni Jónsson & Joaquin Ketlun Sinigaglia
Markús Máni gekk til liðs við Víði eftir að hafa verið að flakka aðeins á milli liða. Hann fann sig greinilega í Víðistreyjunni og skoraði heil 14 mörk í fyrra sem gerði hann að markahæsta leikmanni liðsins. Hann hefur haldið markaskoruninni áfram á undirbúningstímabilinu þar sem hann hefur skorað fimm mörk í átta leikjum. Hann þarf klárlega að halda áfram upptektum hætti ef Víðismenn ætla sér að halda sér í deildinni. Joaquin er markmaður liðsins og er mjög mikilvægur þar sem hann stjórnar liðinu sem aftasti maður. Hann var mjög mikilvægur fyrir Víðismenn seinasta sumar þar sem þeir fengu fæst mörk á sig í deildinni með Káramönnum og þarf klárlega að vera á tánum þar sem Víðir gætu þurft að sitja mikið og spila agaðan varnarleik.
Gaman að fylgjast með: Kristófer Snær Jóhannsson
Ungur og efnilegur miðjumaður sem Víðismenn fengu frá Molde núna í vetur. Kristófer spilaði 19 leiki fyrir varalið Molde í fyrra þar sem hann skoraði tvö mörk. Það verður skemmtilegt að sjá hvernig hann kemur inn í þetta Víðislið í sumar.
Komnir:
Alexis Alexandrenne frá Samherjum
Aron Örn Hákonarson frá Keflavík (Á láni)
Dominic Lee Briggs frá Bandaríkjunum
Dusan Lukic frá RB
Kristófer Snær Jóhannsson frá Noregi
Róbert William G. Bagguley frá Njarðvík (Á láni)
Uros Jemovic frá Aserbaídsjan
Þórir Guðmundsson frá Njarðvík
Farnir:
Bessi Jóhannsson í Hafnir
Elfar Máni Bragason í Reyni S.
Elís Már Gunnarsson í Hafnir
Ísak John Ævarsson í Hafnir
Þjálfarinn segir - Sveinn Þór Steingrímsson
„Spáin kemur mér svo sem ekkert óvart þar sem við erum nýliðar í deildinni. Þetta verður hörkudeild og við höfum átt gott undirbúningstímabil til þessa. Við erum gríðarlega spenntir fyrir sumrinu og munum klárlega reyna að afsanna þessa spá."
Fyrstu þrír leikir Víðis
3. maí, Víðir - Víkingur Ó. (Nesfisk-völlurinn)
9. maí, Haukar - Víðir (BIRTU völlurinn)
16. maí, Víðir - Þróttur V. (Nesfisk-völlurinn)
Athugasemdir
