Diljá Zomers: Ég væri til í að upplifa þetta oftar

Stelpurnar spila á föstudaginn gegn Danmörku í Þjóðadeildinni og nokkrum dögum síðar mæta þær Þýskalandi. Þetta verða tveir gríðarlega erfiðir leikir.

„Það er góð einbeiting. Það gekk vel á æfingu í dag og ég held að við séum allar klárar í föstudaginn."

Diljá segir að það sé klárt mál að íslenska liðið geti strítt danska liðinu á föstudaginn, það er markmiðið. Diljá þreytti frumraun sína á Laugardalsvelli með landsliðinu er liðið vann 1-0 sigur gegn Wales í fyrsta leik liðsins í Þjóðadeildinni í síðasta mánuði. Hún spilaði í vængbakverði í leiknum.

„Ég spilaði í Austurríki í vináttuleik og mér leið þokkalega vel í þessari stöðu. Hún er skemmtileg en ég veit ekki hversu margir leikir til viðbótar verða í þessari stöðu. Ég get tekið margt með mér úr þessu. Þetta var geggjað (að spila á Laugardalsvelli fyrir landsliðið) og ég væri til í að upplifa þetta oftar," sagði Diljá.

Diljá spilar vanalega sem sóknarmaður en hún kemur í fantaformi inn í þetta landsliðsverkefni. Hún hefur verið að spila frábærlega með Leuven í Belgíu og er markahæsti leikmaður belgísku deildarinnar með sex mörk í fjórum deildarleikjum.

„Mér líður mjög vel þarna og fótboltinn gengur mjög vel. Ég fíla það í botn hvernig allt er útfært þarna og ég er búin að læra heilan helling. Það er að skila sér í góðri frammistöðu," sagði Diljá. „Það er alltaf gott að skora mörk sem sóknarmaður og vonandi getur maður komið það hingað inn í þennan hóp líka."