Spá þjálfara og fyrirliða fyrir Lengjudeild kvenna: 4. sæti

Spáin:
1.
2.
3.
4. Grótta, 107 stig
5. Fylkir, 95 stig
6. HK, 84 stig
7. Grindavík/Njarðvík, 66 stig
8. KR, 62 stig
9. Haukar, 61 stig
10. Afturelding, 26 stig

4. Grótta
Grótta var nú alls ekki langt frá því að spila bara í Bestu deildinni síðasta sumar. Liðið var virkilega skemmtilegt í fyrra og endaði með jafnmörg stig og Fram sem komst upp um deild. En það var markatalan sem skildi liðin að, Fram var með +18 í markatölu á meðan Grótta var bara með +5. Gróttuliðið náði mjög fínum árangri þrátt fyrir að vera með frekar ungt lið, en fyrir mótið var Seltirningum spáð áttunda sætinu. Segja má að Gróttuliðið hafi verið spútnikliðið síðustu tvö árin þar sem þær voru líka nálægt því að fara upp árið áður. Núna ætla að þjálfarar og fyrirliðar ekki að sofa á Gróttunni og er þeim spáð fjórða sæti í sumar og núna er búist við því að þær verði í toppbaráttunni.

Þjálfarinn: Annað tímabilið í röð eru þjálfarabreytingar hjá Gróttu en Dominic Ankers er tekinn við sem þjálfari liðsins af Matthíasi Guðmundssyni, sem var ráðinn til Vals eftir að hafa stýrt Gróttu í eitt tímabil. Hann hefur verið aðstoðarþjálfari í báðum meistaraflokkum og einnig þjálfað í yngri flokkum Gróttu. Dom þykir afar snjall æfingaþjálfari en í sumar kemur í ljós hvernig honum tekst að leiða Gróttuhópinn sem ungur aðalþjálfari. Melkorka Katrín Flygenring Pétursdóttir heldur áfram sem aðstoðarþjálfari og mun Guðni Snær Emilsson einnig aðstoða nýjan þjálfara.

Stóra spurningin: Komnar með nóg af næstum því?
Grótta hefur verið alveg ótrúlega nálægt því að taka stökkið upp í Bestu deildina síðustu ár og það hefur verið unnið gott starf á Seltjarnarnesi þessi síðustu misseri. En það má alveg gera ráð fyrir því að leikmenn og fólkið í kringum liðið sé komið með nóg af næstum því. Og núna sé komið að því að taka stökkið upp. Það verður alls ekki auðvelt en það er vel mögulegt.

Lykilmenn: Ryanne Molenaar og Sigrún Ösp Aðalgeirsdóttir
Ryanne Molenaar kom til Gróttu í vetur en hún spilaði í austurrísku B-deildinni í fyrra eftir að hafa lokið ferli sínum í bandaríska háskólaboltanum. Það er enginn augljós markaskorari í Gróttuliðinu en Ryanne er gæðaleikmaður sem getur bæði lagt upp og skorað fyrir Gróttuliðið. Sigrún Ösp er þá einn reynslumesti leikmaður liðsins og hefur verið með fyrirliðabandið. Hún er sterkur varnarmaður og mikill leiðtogi sem er með ótrúlega mikilvæga reynslu fyrir þetta Gróttulið. Hún er ómissandi partur af þessu liði.

Gaman að fylgjast með: Rebekka Sif Brynjarsdóttir
Hún var líka í þessum dálki hérna í fyrra en hún er ótrúlega spennandi leikmaður sem hefur ekki langt að sækja fótboltahæfileikana. Faðir hennar er fyrrum landsliðs- og atvinnumaðurinn Brynjar Björn Gunnarsson. Hún er teknísk, með mikinn leikskilning og bara stórskemmtilegur leikmaður. Rebekka hefur verið að fá stærra og stærra hlutverk í Gróttuliðinu og hefur sýnt að hún er tilbúin í það. Við skulum njóta þess að horfa á Rebekku í sumar því líklegt verður að teljast að hún fari í atvinnumennsku áður en langt um líður.

Komnar:
Birta Ósk Sigurjónsdóttir frá Val
Fanney Rún Guðmundsdóttir frá KH
Haylee Rae Spray frá Bandaríkjunum
Hulda Ösp Ágústsdóttir frá Víkingi R.
Katrín Rut Kvaran frá Aftureldingu
Lilja Davíðsdóttir Scheving frá KR
Maria Baska frá Grikklandi
María Björk Ómarsdóttir frá Dalvík/Reyni
Ryanne Molenaar frá Austurríki
Þórdís Embla Sveinbjörnsdóttir frá Víkingi R. (Á láni)

Farnar:
Arnfríður Auður Arnarsdóttir í Val
Emily Amano til Kanada
Kolbrá Una Kristinsdóttir í Val (Var á láni)
Madelyn Robbins til Írlands
Tinna Bjarkar Jónsdóttir hætt

Við erum þar á meðal
Dominic Ankers, nýr þjálfari Gróttu, segir spána skiljanlega fyrir komandi tímaibl.

„Þetta er skiljanleg spá. Við erum á þeim stað í henni þar sem við enduðum síðustu tvö tímabil og þetta sýnir kannski að við höfum fest okkur í sessi á þessum stað. Við vitum að það verður ýmislegt öðruvísi ef við miðum við síðasta tímabil þar sem það er kominn nýr þjálfari og við höfum misst bæði Aufí og Kolbrá, sem spiluðu stór hlutverk á síðasta tímabili. Það er þó mikilvægt að taka það fram að við erum mjög ánægð hjá Gróttu að þær séu að taka næstu skref í fótboltanum í Bestu deildinni," segir Dominic.

Dominic var aðstoðarþjálfari á síðasta tímabili en hvernig metur hann það sumar?

„Ég held að besta orðið sé kannski súrsætt. Annars vegar var þetta besta tímabil liðsins í þessari deild sem er mikill plús en hins vegar er erfitt að horfa til baka og sjá að liðið komst ekki upp út af markatölu. Það gerir það erfitt að horfa mikið á þetta að fullu í jákvæðu ljósi."

En hvernig hefur gengið á undirbúningstímabilinu?

„Hérna færðu svar sem er líklega algengt þegar lið er að koma inn í vetur með nýjan þjálfara og nokkrar breytingar á leikmannahópi: Þetta hefur verið upp og niður. Við vorum bara með 14 til 15 leikmenn í fyrstu leikjunum í Lengjubikarnum þar sem við vorum enn að reyna að bæta við hópinn en þegar líða fór á veturinn þá bættum við leikmönnum í hópinn og það kom stígandi í þetta eftir æfingaferðina til Spánar, bæði hvað varðar úrslit en líka hvar við erum sem hópur fótboltalega séð og varðandi liðsanda."

Grótta hefur misst sterka leikmenn frá því í fyrra en það hafa komið öflugir leikmenn inn í staðinn.

„Ég talaði um breytingarnar áður en ég er mjög ánægður með hvar liðið er þessa stundina. Það er líklega aðeins meiri samkeppni um stöður en á síðasta tímabili sem er jákvætt og það þýðir líka að við erum með sterka möguleika til að breyta leikjum þegar við þurfum á því að halda. Það er alltaf gott að geta bætt við leikmönnum með reynslu úr Bestu deildinni og ég er spenntur að sjá hvernig erlendu leikmennirnir hafa áhrif á liðið okkar," segir Dominic.

Hvernig sérðu deildina fyrir þér í sumar?

„Ég held að þetta verði jöfn deild í ár. Liðin sem komu upp virðast sterk og það eru margir góðir leikmenn í þessari deild. Það eru örugglega mörg lið sem eru að hugsa um það að fara upp. Við erum þar á meðal."

„Við erum að skipta um gras á Vivaldivellinum og spilum því líklega ekki alla heimaleikina okkar heima á Seltjarnarnesi. Vegna þess þá viljum við hvetja alla á Nesinu til að gera sem mest úr heimaleikjunum sem við eigum á þessu tímabili og koma á völlinn til að styðja. Við vonumað þetta verði spennandi sumar og það er alltaf skemmtilegra þegar það er nóg af fólki á vellinum. Við kunnum virkilega að meta það," sagði Dom að lokum.

Fyrstu þrír leikir Gróttu:
3. maí, Grótta - HK (AVIS völlurinn)
8. maí, ÍBV - Grótta (Hásteinsvöllur)
17. maí, Grótta - Fylkir (Vivaldivöllurinn)