Solskjær er fyrrum leikmaður Manchester United og í raun goðsögn hjá félaginu eftir að hafa skorað sigurmarkið í eftirminnilegum úrslitaleik Meistaradeildarinnar 1999. Hann er hins vegar ekki með mikla þjálfarareynslu og er starfið hjá Man Utd það langstærsta sem hann hefur haft.

Áður en hann tók við Man Utd hafði hann verið að þjálfa Molde í Noregi og hefur hann einnig stýrt Cardiff og varaliði Manchester United.

Matic, einn af reyndari leikmönnum Manchester United, er ánægður með það hvernig Solskjær hefur bætt sig á síðustu 12 mánuðunum.

Í viðtali við Sky Sports sagði hinn 31 árs gamli Matic: „Á hverjum degi er hann að bæta sig, að öðlast meiri reynslu. Hann á bara eftir að verða betri og betri."

„Það á við um alla stjóra. Carlo Ancelotti til dæmis, hann er ekki sami stjóri og hann var fyrir 20 árum. Hann veit meira, hann er með meiri reynslu og það sama á eftir að gerast hjá Ole."

„Að mínu mati er hann miklu betri stjóri núna en hann var fyrir ári síðan."

„Núna þekkir hann alla leikmennina og hann veit hvað hann þarf að gera fyrir alla leiki, eftir alla leiki. Í hans starfi þá er reynslan mjög mikilvæg."

Man Utd heimsækir Everton í næsta leik á sunnudag, en á síðustu leiktíð fékk United skell á Goodison Park, 4-0. Það er vonandi fyrir stuðningsmenn Man Utd að Norðmaðurinn geðþekki hafi lært eitthvað frá þeim leik. Man Utd er í fimmta sæti og Everton í 11. sæti.