„Ég vildi bara að þær myndu gera það sem þær geta, við erum gott fótboltalið, þegar þær eru öruggar og ná í boltann og fá hann í hálfsvæðunum, horfandi fram. Við vorum að spila allt of mikið til baka í fyrri hálfleik og þegar við gerðum það í seinni hálfleik opnuðum við leikinn og vorum hættulegar,“ sagði Nik Anthony Chamberlain eftir 3-1 tap gegn Blikum í Mjóllkurbikar kvenna.
Lestu um leikinn: Breiðablik 3 - 1 Þróttur R.
„Fyrir okkur var þetta leikur tveggja hálfleika, í fyrri hálfleik vorum við mjög varkárar með hvernig við spiluðum og buðum þeim í pressuna, en þær pressuðu okkur vel, en ég fann að við hefðum getað verið aðeins öruggari í því hvernig við hreyfðum boltann, sem við gerðum í seinni hálfleik og komum okkur aftur inn í leikinn."
Gestirnir frá Þrótti þurftu að þola svekkjandi tap í Mjólkurbikar kvenna og duttu þar með út úr bikarnum. Breiðablik spilaði virkilega vel og sýndu gæði í skyndisóknum. Heimakonur eru því einum leik frá því að tryggja sig í úrslit Mjólkurbikarsins.
„Í seinni hálfleik spiluðum við bestu 45 mínúturnar sem við höfum spilað á móti Breiðabliki síðan ég hef verið hjá Þrótti, það er gríðarstórt skref fyrir okkur og nú er áskorunin að taka það inn í þriðjudaginn."