Haukur Páll Sigurðsson aðstoðarþjálfari Vals hafði stjórnartaumana í dag þegar liðið hans sigraði KA 3-1 á heimavelli. Arnar Grétarsson aðalþjálfari liðsins er í leikbanni og því tók Haukur sigur í sínum fyrsta leik sem aðal maðurinn á hliðarlínunni.
Lestu um leikinn: Valur 3 - 1 KA
„Það er ánægja að sækja 3 stig hérna á móti erfiðu KA liði. Þannig að við þurftum að mæta klárir hér, þannig ég er bara hrikalega ánægður."
Haukur er í sínu fyrsta ári í þjálfun eftir að hafa lagt skóna á hilluna. Hann segir að það hafi bara verið fínt að prufa það að vera aðalþjálfari á hliðarlínunni.
„Ég var náttúrulega með góða menn með mér í Viktori, Kjarra og teyminu okkar, Jóa og Einari. Við undirbúum leikinn alltaf það vel þannig í rauninni var þetta bara mjög fínt sko."
Valur tengir núna 2 sigra í röð þar sem þeir sigruðu Breiðablik 3-2 í síðustu umferð og eins og hefur komið fram KA 3-1 í kvöld.
„Það gerir mikið fyrir liðið að skora mörk og sjálfstraustið hjá þeim. Eins og með Patrick sem skorar tvö, þannig það gerir klárlega gott og það eykur möguleikana að sækja 3 stig ef þú skorar 3 mörk í hverjum leik."
Viðtalið má sjá í heild sinni í spilaranum hér fyrir ofan.
