Hver tekur við af Klopp? - Dani Olmo orðaður við Man Utd - Greenwood í skiptum fyrir Gleison Bremer
   sun 06. febrúar 2011 17:57
Hafliði Breiðfjörð
England: Liverpool fór með sigur af hólmi í fyrsta leik Torres
Fernando Torres heilsar upp á Steven Gerrard fyrir leikinn.
Fernando Torres heilsar upp á Steven Gerrard fyrir leikinn.
Mynd: Getty Images
Torres og Daniel Agger eigast við...
Torres og Daniel Agger eigast við...
Mynd: Getty Images
...og Torres liggur eftir.
...og Torres liggur eftir.
Mynd: Getty Images
Chelsea 0-1 Liverpool:
0-1 Raul Meireles ('65)

Það var Liverpool sem fór með sigur af hólm í stórleik helgarinnar í ensku úrvalsdeildinni gegn Chelsea en leiknum var að ljúka á Stamford Bridge með einu marki Liverpool gegn engu.

Allra augu beindust að Fernando Torres sem var að leika sinn fyrsta leik í búningi Chelsea og það hitti þannig á að það var gegn hans gömlu félögum í Liverpool sem hann lék með út janúar.

Torres gekk á gömlu samherja sína í göngunum fyrir leik og tók í hönd þeirra og fékk góðar mótttökur og það sama má segja þegar liðin stilltu sér upp á vellinum fyrir leik. Hann var í framlínu Chelsea með Didier Drogba og Nicolas Anelka.

Þegar leikurinn hófst var ljóst að stuðningsmenn Liverpool voru ekki á sama máli og bauluðu þegar hann fékk boltann. Torres átti fyrsta skotið í leiknum. Maxi Rodriguez sendi þá lélega sendingu þvert á völlinn og beint fyrir fætur Torres og svo virtist sem hann hafi gleymt að hann væri ekki enn liðsfélagi hans. Torres lék að markinu og hefði vel getað gefið á Didier Drogba en þrumaði á markið og langt framhjá.

Liverpool var annan leikinn í röð að stilla upp í leikkerfinu 5-4-1 þar sem bakverðirnir fara hátt upp völlinn en miðjan er mjög þétt með fjóra á miðri miðjunni sem fara mis framarlega og Dirk Kyut einan frammi. Luis Suarez var á meðal varamanna.

Hættulegasta færi fyrri hálfleiksins fékk Maxi Rodriguez. Steven Gerrard sendi boltann þá þvert fyrir markið og leikmenn Chelsea náðu ekki boltanum sem fór fyrir fætur Maxi sem hitti boltann illa og virtist byrjaður að hugsa um að fagna þegar boltinn fór í þverslánna.

Undir lok fyrri hálfleiksins varð undarleg uppákoma þegar Chelsea mennirnir Bransilav Ivanovic og Peter Cech markvörður voru að eltast við sama boltann og þó Cech væri að koma höndum á hann hélt Ivanovic áfram. Cech brást reiður við og greinilegt að pirringur var milli liðsfélaganna.

Torres var skipt af veli eftir 65. mínútna leik fyrir fyrir Salomon Kalou við mikinn fögnuð stuðningsmanna Liverpool. Fjórum mínútum síðar náði Liverpool forystunni. Steven Gerrard lék þá upp að endamörkum, sendi þvert fyrir markið og á fjær þar sem Raul Meireles kom og setti boltann í markið. Hans fjórða mark í fimm leikjum með Liverpool.

Þetta mark dugði Liverpool til sigurs í leiknum og þeir þar með komnir í sjötta sæti deildarinnar og ljóst að Kenny Dalglish hefur snúið gengi liðsins við enda hafa þeir ekki einu sinni fengið á sig mark í fjórum leikjum í röð.

David Luis kom inná sem varmaður hjá Chelsea í sínum fyrsta leik en athygli vakti að Kenny Dalglish stjóri Liverpool notaði aðeins tvær skiptingar og Luis Suarez kom ekki við sögu í leiknum.

Aðeins sex stig skilja Chelsea og Liverpool nú að í fjórða og sjötta sæti deildarinnar og stóra spurningin sem stendur eftir: Gæti Liverpool endað ofar en Torres í lok tímabilsins?
banner
banner
banner