Sterkastur í 21. umferð - Mikilvægt að hann sé með sjálfstraust

„Þetta var frábært. Benó er senterinn okkar og það er mikilvægt að hann sé með sjálfstraust. Hann var frábær fyrir framan markið," sagði Óskar Hrafn Þorvaldsson þjálfari KR eftir 4-2 sigur gegn ÍA í gær.

Benoný Breki Andrésson skoraði fullkomna þrennu í leiknum í gær en til þess þarf maður að skora með vinstri, hægri og skalla boltann inn.

Hann gerði það allt á 35 mínútum og er Sterkasti leikmaður umferðarinnar í boði Steypustöðvarinnar.

„Ég er alltaf mættur inn í teig einhvernveginn. Síðan er ég alltaf að skora, ég er ánægður með þetta," sagði Benoný sjálfur eftir leik en hann er kominn með tíu mörk í deildinni í sumar. Benoný segir að KR-liðið verði að klára seinustu leikina almennilega.

„Við vitum allir að þetta hefur ekki verið nógu gott hjá okkur í sumar. Við þurfum að klára þetta almennilega og halda okkur frá falli. Við ætlum að klára alla leikina.“

Þessi ungi sóknarmaður var í vikunni valinn í U21 landsliðið fyrir komandi verkefni.