' Með okkar gæði, ef við náum réttu orkustigi í leikina og erum vel peppaðir þá ætti það að skila okkur langt'
'Ég væri til í að gera þetta aftur á næsta ári.'
Breiðablik vann Íslandsmeistaratitilinn eftir úrslitaleik á Víkingsvelli.
„Við ætlum að vera sterkir í sumar og við ætlum að spila góðan og skemmtilegan fótbolta. Við verðum að hafa rétt hugarfar komandi inn í alla leiki og einbeita okkur að einum leik í einu. Við erum með rosalega mikil gæði í þessum hóp og þetta snýst því meira um að vera andlega rétt stilltur fyrir hvert einvígi. Með okkar gæði, ef við náum réttu orkustigi í leikina og erum vel peppaðir þá ætti það að skila okkur langt allavega," sagði Sölvi Geir Ottesen, þjálfari Víkings, aðspurður um hvernig liðið ætlaði sér að verða Íslandsmeistari.
Víkingum er spáð toppbaráttu í sumar ásamt Breiðabliki. Víkingum er spáð 2. sætinu hér á Fótbolti.net.
Víkingum er spáð toppbaráttu í sumar ásamt Breiðabliki. Víkingum er spáð 2. sætinu hér á Fótbolti.net.
Ekki í leit að liðsstyrk en þó opnir
Eru Víkingar að reyna bæta við gæðum í hópinn?
„Eins og er þá erum við ekki að leita. Við erum vissulega alltaf opnir fyrir leikmönnum, hvort sem þeir eru að koma heim eða eru spennandi prófílar, þá erum við opnir fyrir því að styrkja hópinn, en eins og staðan er núna erum við ekki að leita sérstaklega að neinum leikmanni. Ég er virkilega sáttur með hópinn eins og hann er núna, þetta er stór og breiður hópur og það er alvöru hausverkur fyrir mig að velja í liðið."
Öðruvísi undirbúningstímabil
Undirbúningstímabilið hjá Víkingi var öðruvísi en hjá öðrum liðum á Íslandi þar sem liðið kláraði í raun ekki síðasta tímabil fyrr en í febrúar þegar liðið mætti Panathinaikos í Sambandsdeildinni. Í kjölfarið fór liðið í æfingaferð til Kanarí og sérstakur undirbúningur fyrir tímabilið 2025 því stuttur.
„Það á í raun eftir að koma í ljós hvaða kostir og gallar eru við þetta. Þetta var virkilega skemmtilegt undirbúningstímabil, skemmtilegra en áður. Vissulega krefjandi að sama skapi, við fáum að fara út í einvígi á móti Panathinaikos sem er frábær upplifun fyrir hópinn, stuðningsmenn og alla í kringum klúbbinn. Ég væri til í að gera þetta aftur á næsta ári. Það er búið að ganga vel að tækla þetta undirbúningstímabil."
„Bose bikarinn var færður rétt fyrir mót, öðruvísi bragur yfir þeim úrslitaleik heldur en hefur veirð áður þegar leikurinn hefur verið í desember. Það var virkilega góð umgjörð um leikinn síðasta föstudag, vel gert líka hjá Gústa (Ágústi Gylfasyni) að setja þetta upp svona og gott málefni sem við vorum að styrkja í leiðinni. Þetta var bara frábær leikur að fá svona rétt fyrir mót. Við komum fullir orku, sjálfstrausts og bjartsýni inn í mótið," segir Sölvi.
„Súrsætt að sjá þetta videó"
Á kynningarfundi Bestu deildarinnar í gær var sýnt myndband frá síðasta tímabili þar sem Breiðablik sigraði Víking í úrslitaleik um Íslandsmeistaratitilinn. Sölvi var á hliðarlínunni í þeim leik.
„Að sjálfsögðu hefðum við getað gert margt öðruvísi, en við erum svo sem ekkert að hanga á því núna. Einbeitingin er bara á því sem við erum að fara gera á þessu tímabili. Það var súrsætt að sjá þetta videó hérna áðan, það gaf okkur smá blóð á tennurnar að vilja hefna fyrir þetta og ná betri endi á tímabilinu. Þetta var virkilega svekkjandi og á að vera svekkjandi. Við komum tvíefldir til leiks á þessu tímabili og ætlum að bæta upp fyrir þetta."
Athugasemdir
