Víkingur vann magnaðan 3-2 endurkomusigur gegn Val í Bestu deild karla í gær. Staðan var 0-2 þegar Danijel Djuric kom af bekknum á 61. mínútu. Hann átti risastóran þátt í því að skila sigri í hús fyrir Víking, með hetjulegri innkomu sinni.

Hann kom Víkingum á bragðið með því að minnka muninn og skoraði síðan einnig sigurmarkið á 86. mínútu. Hann er leikmaður 23. umferðar í boði Steypustöðvarinnar.

„Dani var með eitthvað extra, einhverja áræðni og kraft sem smitaði útfrá sér inn í liðið og skilaði sigrinum. Þess utan skoraði hann tvö mörk og átti frábærar mínútur á þessum lokakafla," skrifaði Sverrir Örn Einarsson, fréttamaður Fótbolta.net, í skýrslu um leikinn.