Kristrún Ýr Holm
Keflavík kom sér á blað í Bestu deildinni í dag þegar liðið bar 1-0 sigurorð af Þrótti í Reykjanesbæ í dag. Liðið kom sér úr botnsæti deildarinnar með sigrinum eftir að hafa tapað fyrstu fimm leikjum sínum í deildinni. Kristrún Ýr Holm fyrirliði Keflavíkur var til viðtals við Fótbolta.net að leik loknum. Aðspurð hvað Keflavíkurliðið hefði gert öðruvísi í dag en fyrr í sumar sagði Kristrún.
Lestu um leikinn: Keflavík 1 - 0 Þróttur R.
„Við vorum mjög skipulagðar, varnarvinnan var gríðarlega góð og með góðan talanda, baráttu og leikgleði, Við ætluðum okkur að vinna þennan leik og bara tókum þetta.“
Aðstæður í Keflavík í dag voru krefjandi svo ekki sé fastar að orði kveðið. Talsverður vindur var auk þess sem völlurinn er ekki orðinn eins og hann verður bestur. Nokkuð sem kannski hjálpaði heimakonum?
„Ég sagði við stelpurnar, þetta er bara klassískt Keflvískt veður og þannig við viljum við hafa það. Við viljum hafa þetta svona og það er erfitt að koma á okkar heimavöll og við ætlum að halda því þannig,“
Fyrstu stig í hús hjá Keflavík eins og áður sagði og Kristrún er bjart sýn á framhaldið hjá liðinu sem hún telur að muni bara eflast.
„Ég hef engar áhyggjur af okkur, við erum með gríðarlega sterka einstaklinga og erum að koma okkur vel saman. Ég held að þetta verði bara upp á við.“
Sagði Kristrún en allt viðtalið má sjá hér að ofan.
Athugasemdir
