Gylfi Þór Sigurðsson var í byrjunarliði Everton gegn Chelsea í kvöld til að fylla í skarð James Rodriguez. Gylfi Þór bar fyrirliðabandið og byrjaði Everton leikinn vel.

Það liðu aðeins 22 mínútur þar til fyrsta markið leit dagsins ljós. Þá gerðist markvörðurinn Edouard Mendy sekur um klaufalegt brot á Dominic Calvert-Lewin innan vítateigs og auðvitað steig Gylfi á punktinn. Hann skoraði af miklu öryggi og héldu heimamenn forystunni út hálfleikinn.

Reece James komst næst því að skora fyrir Chelsea þegar hann skaut í stöng. Leikurinn var áfram jafn í síðari hálfleik og komst Chelsea nálægt því að jafna þegar aukaspyrna Mason Mount small í stönginni.

Lærisveinar Carlo Ancelotti sýndu mikinn baráttuvilja og gerðu frábærlega að halda gestunum í skefjum út uppbótartímann.

Frækinn sigur Everton staðreynd og er liðið komið með 20 stig eftir 12 umferðir. Chelsea er í þriðja sæti, með 22 stig.