Magnús Már Einarsson, þjálfari Aftureldingar.
Jökull Andrésson.
Afturelding spilar í úrslitum Lengjudeildarumspilsins annað árið í röð.
„Það er eftirvænting og spenna. Þetta var mjög gaman síðast, að spila fyrir framan 2000 Mosfellinga var hrikalega gaman. Ég vona að það mæti enn fleiri núna," sagði Magnús Már Einarsson, þjálfari Aftureldingar, í viðtali við Fótbolta.net fyrir 50 milljón króna leikinn gegn Keflavík á morgun.
Um er að ræða úrslitaleikinn í umspili Lengjudeildarinnar en sigurliðið á morgun fer upp í Bestu deildina.
Um er að ræða úrslitaleikinn í umspili Lengjudeildarinnar en sigurliðið á morgun fer upp í Bestu deildina.
Annað árið í röð er Afturelding að taka þátt í þessum leik en liðið tapaði gegn Vestra í fyrra.
„Sjálfstraustið okkar er hærra núna. Fyrst og fremst vil ég bara hrósa strákunum fyrir trúna og liðsheildina í sumar. Um mitt mót leit staðan ekki sérstaklega út en menn höfðu allan tímann trú á því að við myndum koma hingað og spila þennan leik. Það er gríðarlegt hrós á hugarfarið hjá strákunum."
Tímabilið núna var öðruvísi; í fyrra var liðið lengst af á toppnum og missti svo dampinn undir restina en núna var liðið að ströggla framan af og það er að toppa á réttum tíma.
„Já, en ég ætla ekki að þykjast vera einhver snillingur og ég hafi verið að setja þetta svona upp. Við reyndum alveg að vinna leikina í fyrri umferðinni þó það hafi gengið misvel. Mikið hrós á strákana fyrir trúna og liðsheildina. Þeir héldu alltaf áfram og það er að skila okkur hingað. Þó byrjunin á mótinu hafi ekki verið góð þá höfðum við alltaf trú. Við höfum spilað úrslitaleiki frá því í júlí en við urðum að vinna leiki til að koma okkur í topp fimm. Við þurfum að halda því sama áfram."
Hjálpaði mikið að fá Jökul inn
Það hjálpaði mikið fyrir Aftureldingu að fá Jökul Andrésson í markið um mitt sumar, en hann væri líklega einn besti markvörður Bestu deildarinnar ef hann væri að spila þar. Hann kaus hins vegar að fara í uppeldisfélagið sitt og hjálpa því.
„Við héldum áfram að gera réttu hlutina og svo komu sigrar og sjálfstraust. Það hefur allt verið betra hjá okkur. Menn komu sterkir inn í liðið eins og Jökull og Sigurpáll (Mellberg). Liðsheildin hefur verið frábær og það eru forréttindi að fá að starfa með þessum hóp," segir Magnús.
Það hjálpaði væntanlega mikið að fá Jökul inn um mitt sumar?
„Já, engin spurning. Karakterinn er líka geggjaður, frábær drengur og frábær leikmaður. Ég sagði við hann þegar hann kom - þó það væri langsótt þá - að við værum alltaf að stefna á að spila þennan leik hérna og hann væri að fara að koma með okkur hingað. Núna er það að fara að gerast. Það verður gaman að sjá hann og alla strákana í leiknum á laugardag."
Allt viðtalið við Magnús má sjá í spilaranum hér að ofan.
Athugasemdir
