Spá Fótbolta.net - 4. sæti: KR

Spáin:
1. ?
2. ?
3. ?
4. KR 91 stig
5. KA 78 stig
6. Stjarnan 69 stig
7. Víkingur 57 stig
8. Fylkir 56 stig
9. HK 40 stig
10. Keflavík 28 stig
11. ÍA 23 stig
12. Leiknir 14 stig

Um liðið: KR-ingar sátu sárir og svekktir eftir síðasta tímabil. Íslandsmeistararnir frá 2019 misstu af stigum í leikjum sem fyrirfram var reiknað með sigrum. Mótið var blásið af og KR hafnaði í fimmta sætinu, missti af Evrópusæti. KR leitaði réttar síns í dómssölum en það skilaði ekki árangri.



Þjálfari - Rúnar Kristinsson: Einn allra besti þjálfari Íslands, þrívegis hefur Rúnar gert KR að Íslandsmeisturum. Er dýrkaður og dáður í Vesturbænum og hjarta hans slær með félaginu. Bjarni Guðjónsson hefur verið aðstoðarmaður hans undanfarin ár en hann er fluttur til Svíþjóðar þar sem hann starfar við þjálfun yngri flokka Norrköping. Í staðinn er mættur Sigurvin Ólafsson, fyrrum leikmaður KR og núverandi þjálfari KV.

Styrkleikar: Liðið virkar sem öflug vél, er fullt af sigurvegurum og allir eru með sín hlutverk á hreinu. Færni þjálfarateymisins og gríðarleg reynsla í hópnum skila miklu. Liðið er með marga sterka kosti í sóknarleiknum og sterkar sögur um að Kjartan Henry Finnbogason bætist þar við í sumarglugganum.

Veikleikar: Varnarleikurinn er spurningamerki eftir að Finnur Tómas flaug úr hreiðrinu. Í öftustu línu er breiddin ekki mikil og Grétar Snær Gunnarsson verið við hlið Arnórs Sveins Aðalsteinssonar í undirbúningsmótunum. KR-ingar hafa verið í leit að miðverði en hann er ekki enn kominn. Svo er það endalausa umræðan um háan meðalaldur. Geymum hana.

Lykilmenn: Kristinn Jónsson og Óskar Örn Hauksson. Báðir leikmenn sem þarf ekki að kynna fyrir fótboltaáhugafólki! Óskar verður 37 ára í sumar en hann hefur verið funheitur á undirbúningstímabilinu og kemur á flugi inn í mótið. Af öðrum lykilmönnum má nefna Arnór Svein Aðalsteinsson í vörninni og svo eru miklar væntingar í Vesturbænum til þess að Ægir Jarl Jónasson taki annað skref upp á við, fari í enn stærra hlutverk og muni blómstra í sumar.



Fantabrögð mæla með í Draumaliðsdeild Eyjabita:
Stjórnendur Draumaliðsdeildarinnar í ár hafa verið í gjafastuði þegar þeir verðlögðu Atla Sigurjóns. Stigahæsti miðjumaðurinn í fyrra, fleiri stig en Hilmar Árni. En kostar aðeins 7,5! Ef Atli verður ekki með a.m.k. 75% eignarhald í fyrsta leik er eitthvað að.
Smelltu hér til að fara í Draumaliðsdeild Eyjabita

Hlaðvarpsþátturinn Ungstirnin mælir með:
Stefán Árni Geirsson er fjölhæfur miðjumaður fæddur 2000, Stefán er uppalinn KR-ingur sem á 11 leiki fyrir yngri landslið Íslands og var í nokkuð mikilvægu hlutverki hjá KR sumarið 2020 eftir að hafa verið á láni hjá Leikni í Breiðholti árið áður og var í lykilhlutverki. Stefán sýndi oft á tíðum í fyrra hvers megnugur hann er og sérstaklega í leik KR og Breiðabliks í Frostaskjólinu þegar hann skoraði frábært einstaklingsmark. Stefán er einn af fáum uppöldnum KR-ingum í hópnum og það er ekki spurning að stuðningsmenn KR-inga muni sjá hann blómstra á vellinum í sumar.

Spurningarnar: Hvernig mæta KR-ingar til leiks eftir vonbrigðin í fyrra? Taka yngri leikmenn liðsins stærra hlutverk? Hefur KR það sem þarf til að berjast við liðin sem er spáð fyrir ofan?

Völlurinn: Meistaravellir eru sígildir þó löngu sé kominn sé tími á að svæðið sé tekið í gegn. KR-ingar halda tryggð við náttúrulega grasið.

„KR stefnir alltaf að því að vinna Íslandsmótið"

Þjálfarinn segir - Rúnar Kristinsson
„Ég tel mig vera með mjög gott lið í höndunum. Ég væri til í að hafa tvo leikmenn í viðbót. Ég er með fullt af sóknarmönnum og miðjumönnum en mig vantar breidd í vörninni. Við stefnum alltaf á að vera með í baráttunni um Íslandsmeistaratitilinn. Þannig er það alltaf hjá KR, sama hvernig árar og hvernig hin liðin eru mönnuð. Við horfum á okkar lið með það að leiðarljósi að vera með nægilega gott lið til að vinna mótið. Við getum alveg verið í baráttunni með þessum liðum, við erum jafn vel spilandi og jafn góðir og hin liðin í toppbaráttunni," sagði Rúnar í útvarpsþættinum Fótbolti.net á X977.

Komnir
Grétar Snær Gunnarsson frá Fjölni
Guðjón Baldvinsson frá Stjörnunni

Farnir
Ástbjörn Þórðarson í Keflavík
Finnur Orri Margeirsson í Breiðablik
Finnur Tómas Pálmason til Norrköping
Gunnar Þór Gunnarsson hættur
Jóhannes Kristinn Bjarnason til Norrköping
Pablo Punyed í Víking R.

Fyrstu fimm leikir KR:
2. maí Breiðablik - KR
7. maí KR - KA
12. maí Fylkir - KR
17. maí KR - Valur
22. maí FH - KR

Sjá einnig:
Hin hliðin - Atli Sigurjónsson
Hin hliðin - Hjalti Sigurðsson

Leikmenn KR:
1 - Beitir Ólafsson
13 - Guðjón Orri Sigurjónsson
30 - Sigurpáll Sören Ingólfsson
2 - Hjalti Sigurðsson
4 - Arnþór Ingi Kristinsson
5 - Arnór Sveinn Aðalsteinsson
6 - Grétar Snær Gunnarsson
7 - Guðjón Baldvinsson
8 - Emil Ásmundsson
10 - Pálmi Rafn Pálmason
11 - Kennie Chopart
14 - Ægir Jarl Jónasson
15 - Emil Ásmundsson
17 - Alex Freyr Hilmarsson
18 - Aron Bjarki Jósepsson
19 - Kristinn Jónsson
20 - Oddur Ingi Bjarnason
21 - Kristján Flóki Finnbogason
22 - Óskar Örn Hauksson
23 - Atli Sigurjónsson
24 - Þorsteinn Örn Bernharðsson
26 - Hrafn Tómasson
27 - Birgir Steinn Styrmisson
28 - Jökull Tjörvason
29 - Stefán Árni Geirsson

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Gunnar Birgsson, Hafliði Breiðfjörð, Ingólfur Sigurðsson, Magnús Már Einarsson, Sverrir Einarsson, Sæbjörn Þór Þórbergsson Steinke, Tómas Þór Þórðarson