Ingibjörg á leið á æfingu í Znojmo í gær
„Nei, ég hef aldrei komið hingað. Þetta er öðruvísi en maður er vanur en mér líst vel á þetta,“ sagði landsliðskonan Ingibjörg Sigurðardóttir aðspurð að því hvort hún hefði komið áður til Tékklands. Hún er mætt með íslenska landsliðinu til borgarinnar Znojmo þar sem Tékkland og Ísland mætast í undankeppni Heimsmeistaramótsins á morgun.
„Við erum búnar að vera að safna orku. Borða vel og sofa. Reyna að ná í alla orku sem við getum fengið. Við erum ferskar og hlökkum til að fara á æfingu. Erum tilbúnar í morgundaginn,“ sagði Ingibjörg en Fótbolti.net náði tali af henni rétt fyrir síðustu æfingu Íslands fyrir leik.
„Við viljum alltaf fá sigur og gerum allt til þess að ná honum en þær eru með erfitt lið og eru mjög sterkar líkamlega þannig að þetta verður erfiður leikur.“
Ingibjörg er þekkt fyrir að vera hörð af sér innanvallar og var spurð út það að takast á við líkamlega sterka leikmenn Tékka.
„Mér finnst það skemmtilegast. Aðeins að fá að ýta í þær. Þær taka því vel og gera það á móti þannig að maður verður að vera tilbúin í það,“ svaraði Ingibjörg.
Hægt er að horfa á viðtalið í heild sinni í spilaranum hér að ofan.
Athugasemdir
