Það fóru nokkrir leikir fram í forkeppnum Sambandsdeildarinnar og Meistaradeildarinnar í dag og í kvöld og komu þrír Íslendingar við sögu.
Í Meistaradeildinni var Hákon Arnar Haraldsson á sínum stað í byrjunarliði Lille sem tapaði á útivelli í Prag, höfuðborg Tékklands, en tókst þrátt fyrir það að tryggja sér sæti í deildarkeppni Meistaradeildarinnar í haust.
Lille tapaði 2-1 á útivelli í kvöld eftir að hafa unnið heimaleikinn 2-0 og fer því áfram með samanlagðan 3-2 sigur.
Hákon spilaði fyrstu 85 mínúturnar í kvöld á sama tíma og Elías Rafn Ólafsson varði mark Midtjylland á útivelli gegn Slovan Bratislava í Slóvakíu.
Liðin höfðu gert jafntefli í fyrri leiknum í Danmörku og ríkti mikið jafnræði í opnum og skemmtilegum leik í kvöld þar sem bæði lið fengu mikið af frábærum færum en gestirnir frá Danmörku voru með forystuna allt þar til á lokakaflanum.
Heimamönnum í Bratislava tókst þá að snúa leiknum við með tveimur mörkum á fjögurra mínútna kafla til að tryggja sér sæti í deildarkeppni Meistaradeildarinnar.
Elías Rafn og félagar í Midtjylland munu því ekki leika í Meistaradeildinni í haust, heldur fara þeir beint inn í deildarkepni Evrópudeildarinnar.
Að lokum var Andri Lucas Guðjohnsen í byrjunarliði belgíska félagsins Gent sem tryggði sér sæti í deildarkeppni Sambandsdeildarinnar.
Gent tók á móti Partizan frá Belgrad og vann 1-0 eftir að hafa unnið fyrri leikinn á útivelli með sama mun. Andri spilaði fyrstu 65 mínúturnar áður en honum var skipt af velli þegar staðan var enn markalaus.
Í öðrum leikjum kvöldsins komust Dinamo Zagreb og Rauða stjarnan, Crvena zvezda, í deildarkeppni Meistaradeildarinnar með góðum sigrum gegn Qarabag og Bodö/Glimt, sem munu leika í Evrópudeildinni.
Tyrkneska félagið Istanbul Basaksehir tryggði sér þá þátttöku í deildarkeppni Sambandsdeildarinnar með sigri á St. Patricks frá Írlandi, 2-0 samanlagt.
Slavia Prag 2 - 1 Lille (2-3 samanlagt)
1-0 C. Zafeiris ('5)
1-1 Edon Zhegrova ('77)
2-1 Ivan Schranz ('84)
Slovan Bratislava 3 - 2 Midtjylland (4-3 samanlagt)
1-0 M. Tolic ('33)
1-1 A. Simsir ('41)
1-2 Franculino ('50)
2-2 M. Tolic ('82)
3-2 T. Barseghyan ('86)
Gent 1 - 0 Partizan (2-0 samanlagt)
1-0 M. Delorge-Knieper ('88)
Athugasemdir