Al-Orubah heimsótti Al-Wehda og lenti undir strax á fyrstu mínútu þegar Odion Ighalo skoraði. Gestirnir náðu þó að jafna fyrir leikhlé eftir stoðsendingu frá Jóhanni Berg Guðmundssyni og hélst staðan jöfn allt þar til í lokin.

Heimamönnum í Al-Wehda tókst þá að gera sigurmark í uppbótartíma og eru Ighalo og félagar komnir með fjögur stig eftir tvær fyrstu umferðirnar á nýju tímabili. Al-Orubah er án stiga.

Aleksandar Mitrovic var þá hetjan er ríkjandi meistarar Al-Hilal héldu fullkominni byrjun á nýju tímabili áfram.

Al-Hilal tók á móti Damac og tók forystuna undir lok fyrri hálfleiks eftir mark frá Mitrovic. Gestirnir náðu þó að snúa stöðunni við í upphafi síðari hálfleiks og lentu heimamenn í Al-Hilal í miklum vandræðum.

Þeir áttu í erfiðleikum með að skapa sér færi en tókst að jafna á 73. mínútu, áður en Mitrovic gerði sigurmarkið á lokakaflanum eftir undirbúning frá Renan Lodi.

Sergej Milinkovic-Savic, Rúben Neves, Kalidou Koulibaly og Bono voru meðal byrjunarliðsmanna Al-Hilal.

Að lokum vann Al-Ettifaq sigur gegn Al-Akhdoud þökk sé sigurmarki frá Moussa Dembele, fyrrum leikmanni Lyon, Atlético Madrid, Celtic og Fulham.

Steven Gerrard þjálfar Al-Ettifaq og er liðið búið að vinna tvo fyrstu leikina á nýju tímabili án þess að fá mark á sig. Georginio Wijnaldum og Seko Fofana voru meðal byrjunarliðsmanna í dag.

Al-Wehda 2 - 1 Al-Orubah
1-0 Odion Ighalo ('1)
1-1 Z. Al-Hanety ('33)
2-1 M. Khadhari ('93)

Al-Hilal 3 - 2 Damac
1-0 Aleksandar Mitrovic ('45+5)
1-1 F. Kamano ('49)
1-2 Habib Diallo ('53)
2-2 M. Al-Juwayr ('73)
3-2 Aleksandar Mitrovic ('84)

Al-Ettifaq 1 - 0 Al-Akhdoud
1-0 Moussa Dembele ('63)