Kolbeinn Birgir Finnsson lék allan leikinn í vinstri bakvarðarstöðunni með varaliði Borussia Dortmund sem heimsótti Saarbrucken í þýsku C-deildinni í dag.
Heimamenn í Saarbrucken voru með smávægilega yfirburði en staðan hélst markalaus allt þar til í uppbótartíma þegar heimamenn náðu að pota inn sigurmarki.
Richard Neudecker skoraði á 93. mínútu og tryggði Saarbrücken þannig áframhaldandi fullu húsi stiga þar sem liðið er komið með níu stig eftir þrjár umferðir.
Dortmund er aftur á móti aðeins með eitt stig eftir að hafa tapað heimaleik 0-4 gegn Ingolstadt í síðustu umferð.
Saarbrücken 1 - 0 Borussia Dortmund
1-0 Richard Neudecker ('93)
Alexander Ingi Gunnþórsson og félagar í Skjetten töpuðu þá í norsku D-deildinni en Alexander Ingi hefur verið að gera frábæra hluti þar á undanförnum vikum.
Alexander skoraði til að mynda tvö og gaf tvær stoðsendingar í mögnuðum 4-3 sigri í síðustu umferð og þá skoraði hann einnig í 5-4 sigri umferðina þar á undan.
Í dag var þó komið að tapleik, Skjetten réði ekki við fallbaráttulið Senja sem hefur verið á mikilli uppleið síðustu vikur.
Skjetten siglir lygnan sjó, tólf stigum eftir toppsætinu og tólf stigum fyrir ofan fallsvæðið.
Senja 3 - 1 Skjetten