Tipsbladet í Danmörku ræddi við Sam Lee, sem skrifar um City fyrir The Athletic, og spurði hann frekar út í áhugann á íslenska landsliðsframherjanum.

„Ég held að þetta muni ekki gerast en ég veit að City hefur skoðað tvo framherja; Orra Stein og Kyogo Furuhashi hjá Celtic. Ég heyrði að síðustu viku að Pep (Guardiola) teldi að hann þyrfti örugglega ekki annan sóknarmann," segir Lee.

Ef Orri endar hjá City, þá verður hann í samkeppni við Erling Haaland sem hefur verið markahæsti leikmaður ensku úrvalsdeildarinnar síðustu tvö tímabil.

„Hugsunin er að fá inn sóknarmann sem væri þá bara sáttur að vera hjá City, jafnvel þótt hann myndi ekki spila mikið. Það væri þá ekkert drama ef hann myndi ekki spila mikið."

„Ef Orri endar hjá City þá mun félagið líklega líta á hann sem ákveðið verkefni. Hann getur þá þróað sig og lært hjá City. Hvaða sóknarmaður sem er keyptur verður varamaður fyrir Haaland."

Lee telur það möguleika að City hafi fundið Orra Stein þegar Englandsmeistararnir mættu FC Kaupmannahöfn í Meistaradeildinni á síðasta tímabili. Orri átti frábæra stoðsendingu í því einvígi.

Það er mikill áhugi á hinum 19 ára gamla Orra víða um Evrópu og verður áhugavert að sjá hvort að hann yfirgefi dönsku höfuðborgina áður en glugginn lokar á næstu dögum.