Heimild: 433.is
Ýmis orð eru látin flakka milli leikmanna í hita leikja enda rimmurnar ófáar á vellinum. Valsmenn unnu flottan 2-0 sigur gegn FH í kvöld en Bjarni Þór Viðarsson, leikmaður FH, og Kristinn Freyr Sigurðsson, leikmaður Vals voru að kýtast.
433.is er með skemmtilega sögu á vef sínum þar sem Bjarni Þór Viðarsson á að hafa látið áhugaverða setningu falla við Kristin.
„Hann byrjaði á að spyrja Kidda hver hann væri," er haft eftir ónafngreindum leikmanni í röðum Vals á 433.
Eftir einhver orðaskipti sagði Bjarni svo: „Ég á allavega miklu meiri pening en þú!"
Bjarni gekk í raðir FH í vetur eftir að hafa verið í atvinnumennskunni undanfarin ár.
Uppfært: Bjarni Þór segir það af og frá að hann hafi sagt þessa setningu í leiknum í kvöld. „Við áttum í einhverjum orðaskiptum en að ég hafi sagt þetta er eins langt frá því að vera satt og hægt er," sagði Bjarni við 433.is.
Athugasemdir