| fös 28.apr 2023 14:30 Mynd: Fótbolti.net - Jónína Guðjörg Guðbjartsdóttir |
|
Spá þjálfara og fyrirliða í Lengjudeild kvenna: 7. sæti
Fótbolti.net kynnir liðin sem leika í Lengjudeild kvenna í sumar eitt af öðru eftir því hvar þeim er spáð í deildinni. Við fengum alla fyrirliða og þjálfara í deildinni til að spá fyrir sumarið. Liðin fengu stig frá 1-9 en ekki var hægt að spá fyrir sínu eigin liði. Augnabliki er spáð sjöunda sæti deildarinnar.
Augnabliki er spáð sjöunda sæti.
Kristrún Lilja Daðadóttir.
Vilhjálmur Kári Haraldsson.
Úr leik á undirbúningstímabilinu.
Viktoría París Sabido.
Herdís Halla er mjög efnilegur markvörður.
Úr leik í vetur.
1.
2.
3.
4.
5.
6.
7. Augnablik, 57 stig
8. Grindavík, 44 stig
9. Fram, 40 stig
10. KR, 38 stig
Lokastaða í fyrra: Augnablik, sem er venslafélag Breiðabliks átti svipað sumar í fyrra, og árið áður. Liðið endaði í áttunda sæti Lengjudeildarinnar með 16 stig en árið áður náði liðið í 17 stig. Augnablik hefur spilað í næst efstu deild frá 2019 og eru stelpurnar í liðinu að fá dýrmæta reynslu gegn góðum andstæðingum.
Þjálfarinn: Kristrún Lilja Daðadóttir er áfram þjálfari liðsins en hún hefur stýrt Augnabliki undanfarin tvö leiktímabil. Kristrún, eða Kitta eins og hún er kölluð, er hokin af reynslu í þjálfarabransanum en hún fær góðan mann með sér í teymið í ár; Vilhjálmur Kári Haraldsson stýrir liðinu með henni. Hann stýrði liðinu áður en Kristrún tók við.
Styrkleikar: Þær spila góðan fótbolta, vilja stjórna og spila sóknarbolta. Flestir leikmenn liðsins eru búnir að vera lengi saman og þekkja vel inn á hvor aðra, en leikmenn liðsins ættu að þekkjast vel úr yngri flokkum Breiðabliks. Þær eru með reynslumikla þjálfara sem virka vel með ungum hóp. Kjarninn hefur haldist ágætlega saman. Þetta er skemmtilegt verkefni þar sem leikmenn fá að stíga sín fyrstu skref í meistaraflokki, tækifæri til að vaxa og dafna,
Veikleikar: Reynslan í liðinu er ekki mikil, allir leikmenn liðsins eru ungir og eru þær flestar að stíga sín fyrstu skref í meistaraflokki. Sumar í liðinu eru kannski ekki alveg tilbúnar líkamlega í meistaraflokksfótbolta í Lengjudeildinni og þær þurfa að spila á öðrum styrkleikum en það. Þær hafa misst mikilvæga leikmenn frá síðustu leiktíð og þurfa aðrir leikmenn að stíga upp.
Lykilmenn: Herdís Halla Guðbjartsdóttir, Emilía Lind Atladóttir og Viktoría París Sabido.
Fylgist með: Edith Kristín Kristjánsdóttir er gríðarlega spennandi leikmaður. Hún er miðjumaður sem er fædd árið 2008. Er að spila sitt fyrsta ár í meistaraflokki en hún þykir vera mjög efnigur leikmaður.
Komnar
Edith Kristín Kristjánsdóttir frá Breiðabliki
Eva Steinsen Jónsdóttir frá Breiðabliki
Ísabella Eiríksdóttir frá Breiðabliki
Líf Joostdóttir van Bemmel frá Breiðabliki
Rakel Sigurðardóttir frá Breiðabliki
Farnar
Björk Bjarmadóttir í Breiðablik (var á láni)
Dísella Mey Ársælsdóttir í Breiðablik (var á láni)
Eydís Helgadóttir í KR
Eyrún Vala Harðardóttir í Stjörnuna
Harpa Helgadóttir í Breiðablik (var á láni)
Hrafnhildur Ása Halldórsdóttir í Breiðablik (var á láni)
Hugrún Helgadóttir í KR
Júlía Katrín Baldvinsdóttir í FJölni
Katrín Sara Harðardóttir í Fylki
Þyrí Ljósbjörg Willumsdóttir í Fram
Að gera betur og læra meira
Kristrún Lilja, þjálfari Augnablik, segir að spáin komi svo sem ekkert mikið á óvart. „Nei nei, þetta er kannski í samræmi við niðurstöður úr Lengjubikarnum."
„En svo eru flest liðin að styrkja sig með nokkrum leikmönnum innlendum sem erlendum þannig þetta verður bara skemmtilegt fótboltasumar. Við erum spennt að hefja leik."
„Undirbúningurinn hefur gengið ágætlega. Mikið um landsliðsæfingar sem gerir okkur erfitt fyrir; gaman fyrir stelpurnar minna skemmtilegt fyrir okkur Villa. En það er góð samvinna í félaginu, meistaraflokki, 3. flokki og Smárinn og við vinnum í lausnum. Þá höfum við verið með frábæra stráka í markinu á flestum æfingum."
Hún segir það mjög gott að fá Villa aftur inn í teymið. „Frábært að fá Villa inn, hann er hokinn af reynslu, kann leikinn og lumar á ýmsum óvæntu. Svo er hann eiginlega pirrandi yfirvegaður alltaf sem vegur vel upp á keppnis- og athyglisbrestinn minn," segir Kitta létt en eru miklar breytingar frá síðasta tímabili?
„Það eru alltaf breytingar. Nú eru það 5 – 6 frá síðasta tímabili sem munu tækifæri með öðrum liðum. Við reynum að styðja stelpurnar að taka næstu skref og höldum áfram að vinna með ungum og efnilegum stelpum."
Það má áfram búast við mjög ungum meðalaldri í liði Augnabliks þar sem margir efnilegir leikmenn munu fá tækifæri í hverjum einasta leik. Kitta býst við hörkukeppni í Lengjudeildinni í sumar.
„Þetta er hörkudeild og á ég von á jöfnum leikjum. Verður gaman að sjá hvernig erlendu leikmennirnir koma inn í þetta, en það er mikill metnaður og flott umgjörð hjá öllum þessum liðum. Markmiðin okkar eru framfarir, að gera betur, læra meira. Svo er það bara gamla tuggan, safna stigum."
„Ég vil hvetja fólk til þess að mæta á völlinn og hvetja þessar ungu stelpur okkar áfram í blíðu og stríðu. Lofa að það verði engin svikin; barátta, varnartilburðir, falleg mörk, gleði og ástríða verða hjá öllum liðum í Lengjudeild kvenna í ár - þrátt fyrir að hún muni ekki vera staðfest í OZ-kerfinu eins og Lengjudeild karla, í samvinnu við ÍTF!"
Fyrstu þrír leikir Augnabliks:
3. maí, HK - Augnablik (Kórinn)
12. maí, Víkingur R. - Augnablik (Víkingsvöllur)
17. maí, Augnablik - Grótta (Kópavogsvöllur)
