Spá þjálfara og fyrirliða í Lengjudeild kvenna: 9. sæti

Spáin:
1.
2.
3.
4.
5.
6.
7.
8.
9. Fram, 40 stig
10. KR, 38 stig

Lokastaða í fyrra: Fram er með tiltölulega nýstofnað lið í kvennaboltanum en þær mættu af krafti í 2. deildina í fyrra og tóku hana með trompi. Þær stóðu uppi sem meistarar, enduðu með fjórum stigum meira en Grótta sem lenti í öðru sæti deildarinnar. Núna tekur við ný og erfiðari áskorun í Lengjudeildinni.

Þjálfararnir: Aníta Lísa Svansdóttir og Óskar Smári Haraldsson tóku við liðinu fyrir tímabilið í fyrra og komu Fram beint upp í Lengjudeildina. Þau eru bæði ung að árum en þeim hefur tekist að sanka að sér góðri reynslu á stuttum ferli. Það virkar oft ekki að vera með tvo aðalþjálfara en þau virðast ná einstaklega vel saman og vega hvort annað vel upp.

Sjá einnig:
Heimavöllurinn: Fram flaug upp í fyrstu, hverjar fara í Evrópureisu?

Styrkleikar: Það er alltaf ákveðinn styrkleiki sem felst í því að fara upp um deild, þau lið taka ýmislegt með sér í nýja keppni. Íslenskir leikmenn liðsins eru margar áfram og mun mæða mikið á þeim í sumar. Það var mikil stemning í Úlfarsárdalnum í fyrra og liðið spilaði skemmtilegan fótbolta sem hægt er að byggja á. Eins og þjálfarar liðsins hafa talað um þá er verið að gera hlutina vel hjá Fram í kvennaboltanum og það er vel staðið að liðinu.

Veikleikar: Úrslit liðsins á undirbúningstímabilinu hafa ekki verið til að hrópa húrra fyrir, bara alls ekki. Þær hafa verið að fá á sig mörg mörk og skorað fá í vetur en liðið hefur ekki alveg fundið taktinn til þessa. Jessie Ray og Ana Bral voru lykilmenn í sóknarleik Fram í fyrra en þær eru báðar horfnar á braut og tókst Fram aðeins að skora tvö mörk í Lengjubikarnum. Það hafa leikmenn verið að bætast við hópinn rétt fyrir mót og spurning hversu langan tíma það gengur fyrir þær að aðlagast.

Lykilmenn: Breukelen Woodard, Elaina Lamacchia og Erika Rún Heiðarsdóttir.

Fylgist með: Sylvía Birgisdóttir kom til Fram í vetur frá Stjörnunni. Þar er á ferðinni skemmtilegur sóknarbakvörður sem hefur verið óheppin með meiðsli síðustu ár. Hún býr yfir miklum hraða og styrk, og gæti hjálpað Fram mikið í sumar.

Komnar
Alexa Kirton frá Stjörnunni
Bríet Elvan Sæbjörnsdóttir frá Snæfellsnesi
Elaina Lamacchia frá Ítalíu
Emilía Ingvadóttir frá KR
Eva Karen Sigurdórsdóttir frá HK (á láni)
Eydís Arna Hallgrímsdóttir frá FH (á láni)
Grace Therese Santos frá Bandaríkjunum
Írena Björk Gestsdóttir frá Grindavík
Jóhanna Melkorka Þórsdóttir frá Stjörnunni (á láni)
Katrín Ásta Eyþórsdóttir frá FH (á láni)
Ólína Sif Hilmarsdóttir frá Fjölni
Sylvía Birgisdóttir frá Stjörnunni
Thelma Lind Steinarsdóttir frá Stjörnunni (á láni)
Þóra Rún Óladóttir frá Haukum
Þórey Björk Eyþórsdóttir frá Haukum
Þyrí Ljósbjörg Willumsdóttir frá Breiðabliki

Farnar
Ana Catarina Da Costa Bral í Hauka
Ásta Hind Ómarsdóttir í ÍR
Ástrós Eva Ingólfsdóttir frá Danmörku
Iryna Maiborodina til Úkraínu
Jessica Grace Kass Ray hætt
Lára Mist Baldursdóttir í Hauka (var á láni)
Lára Ósk Albertsdóttir í Fjölni (á láni)
Marissa Dora Zuchetto til Kanada

FRAMtíðin er björt
„Þetta er bara fín spá og kemur okkur í rauninni ekkert á óvart," segja Aníta Lísa og Óskar Smári, þjálfarar Fram, í samtali við Fótbolta.net. „Það er eðlilegt að spá okkur þessu sæti sem nýliðar og eftir veturinn. Stelpurnar eru hins vegar staðráðnar í því að afsanna þessa spá."

Fram hefur ekki verið að ná í góð úrslit á undirbúningstímabilinu en liðið endaði neðst í B-deild Lengjubikarsins.

„Undirbúningstímabilið hefur gengið bara mjög vel. Þó að úrslitin hafa ekki verið góð þá er liðið í ákveðinni vegferð og við höfum lært mikið. Margir ungir leikmenn hafa verið að spila mikilvægar mínútur og allir tekið mikinn lærdóm úr þessu. Við höfum æft vel og fórum í mjög góða æfingaferð til Spánar þannig að hópurinn er bara virkilega spenntur fyrir tímabilinu," segja þjálfararnir en það hafa orðið nokkrar breytingar á hópnum frá því í fyrra.

„Það eru einhverjar breytingar, já. Við erum með sama hrygg af íslenskum stelpum en þar sem við fórum upp um deild þá eru auðvitað einhverjar sem vildu skoða önnur lið. Þá höfum við fengið nýja leikmenn til okkar. Einnig erum við ekki með sömu erlendu leikmenn og í fyrra þannig það eru einhverjar breytingar."

„Við búumst við því að þessi deild verði rosalega jöfn og skemmtileg. Það eru mörg lið sem eru að leggja mikið í þetta og verður spennandi að sjá hvernig þetta mun spilast."

Þau segja framtíðina bjarta í Fram.

„FRAMtíðin er björt. Félagið er í fyrsta sinn í þónokkur mörg ár með meistaraflokk og yngri flokka alveg niður. Við erum í góðu samstarfi í 3. flokki með ÍR og U20 var svo stofnað núna í vetur. Það hefur verið erfitt fyrir okkur að horfa á leikmenn í öðrum liðum sem eru að spila vel sem eru uppaldar í Fram en þurftu í raun að finna sér nýtt lið þar sem það tók ekkert við eftir 5. flokk. Í dag er raunin önnur og er yngriflokkastarfið í miklum gír og blasir við okkur mjög svo bjart framtíð."

„Við hvetjum alla fótboltaáhugamenn að mæta á völlinn í Lengjudeild kvenna. Ekki bara beint til okkar stuðingsmanna - sem hafa verið hreint út sagt frábærir - heldur líka stuðningsmenn annarra liða og knattspyrnuáhugafólk yfir höfuð. Kvennaknattspyrna er í mikilli sókn og það erumjög margir frambærilegir leikmenn í Lengjudeildinni í ár, bæði innan okkar liðs og annarra liða sem við hvetjum fólk til þess að koma og horfa á spila. Auk þess teljum við eins og áður kom fram að deildin sé alltaf að verða betri og betri og búumst við þjálfarar við mjög svo skemmtilegri deild. Áfram fótbolti!" segja þau Aníta Lísa og Óskar Smári að lokum.

Fyrstu þrír leikir Fram:
2. maí, Fram - Grindavík (Framvöllur)
12. maí, HK - Fram (Kórinn)
17. maí, Fram - Víkingur R. (Framvöllur)