Sveindís Jane Jónsdóttir.
„Ég held að þetta sé ekki skelfileg niðurstaða fyrir okkur. Við eigum heimaleikinn inni og það er bara að duga eða að drepast," sagði Sveindís Jane Jónsdóttir, leikmaður Íslands, eftir 1-1 jafntefli gegn Austurríki í undankeppni EM í kvöld.
Lestu um leikinn: Austurríki 1 - 1 Ísland
„Ég er svolítið svekkt að hafa ekki tekið öll þrjú stigin. Mér fannst við vera líklegri aðilinn til að skora annað markið. Ég hefði viljað halda áfram að spila því ég er viss um að við hefðum skorað næsta mark," sagði Sveindís en Ísland mætir Austurríki aftur á Laugardalsvelli á þriðjudaginn.
„En það er gott að við eigum strax leik á þriðjudaginn. Það er leikur sem við verðum að vinna."
Sveindís meiddist stuttu fyrir landsleikjagluggann þegar hún varð fyrir ljótu broti í leik með Wolfsburg. Hún fékk stóran skurð á hnéð en spilaði samt í dag. Héldu allir saumarnir?
„Næstum því. Það eru einhverjir farnir og það þarf eitthvað að kíkja á þetta. Þetta er ekkert hættulegt. Ég verð alveg 100 prósent klár á þriðjudaginn."
„Það er það besta í stöðunni að fá að spila strax aftur við þær. Ég er svekkt að hafa ekki tekið þrjú stigin. Það er ekkert annað í stöðunni (en að klára þær á heimavelli). Þetta er okkar heimavöllur og þar eigum við að taka öll þrjú stigin," sagði Sveindís.
Athugasemdir
