Varnarmaðurinn Denzel Dumfries segist skilja það vel að enska landsliðið hafi fengið vítaspyrnu er hann sparkaði í Harry Kane í 2-1 tapinu gegn Englandi í kvöld.
Dumfries fór með takkana í Kane sem var ný búinn að hleypa af skoti úr teignum.
Ekki var dæmt á brotið þegar það átti sér stað heldur var Felix Zwayer, dómari leiksins, beðinn um að skoða VAR-skjáinn og dæmdi hann í kjölfarið víti.
Dumfries var að koma í veg fyrir skot og virtust þessi mistök langt í frá því að vera skýr og augljós.
Hollendingurinn kvartaði þó lítið yfir vítaspyrnunni og tók alla ábyrgð á þessu klaufalega broti.
„Ég vil koma í veg fyrir skotið en ég kom varla við hann,“ sagði Dumfries sem svaraði því játandi er hann var spurður hvort honum hafi fundist þetta vera VAR-víti.
„Það er snerting. Á því augnabliki veistu að hann gæti gefið vítaspyrnu. Það er mjög pirrandi en ég tek fulla ábyrgð á því. Þetta var samt ekki viljaverk en já svona hlutir gerast á sekúndubroti. Síðan er gefið víti og svo verður þú bara að halda áfram,“ sagði hann við NOS.
Athugasemdir