Sterling var utan hóps gegn Manchester City um helgina og sendi í kjölfarið frá sér tilkynningu þar sem hann sagðist ósáttur við stöðu mála.

Enzo Maresca, stjóri Chelsea, hefur verið hreinskilinn varðandi framtíð hans og Ben Chilwell. Báðir mega fara frá félaginu, en þeir verða ekki heldur í hóp gegn Servette í umspili Sambandsdeildarinnar á morgun.

Félög frá Sádi-Arabíu hafa sýnt Sterling áhuga og þá hefur hann einnig verið orðaður við Juventus á Ítalíu, en hugur Sterling er í ensku úrvalsdeildinni.

Sterling og fjölskyldu hans líður vel á Englandi og þá vill hann ólmur spila aftur fyrir þjóð sína.

Leikmaðurinn er meðvitaður um stöðu sína hjá Chelsea og vinna umboðsmenn hans nú hörðum höndum að því að finna nýtt félag fyrir Sterling.