Aron Einar svarar spurningum lesenda

Alex Jónsson
Hvar sérðu þig eftir tíu ár?
Heima á Íslandi. Ég er ekki viss um hvað ég verð að gera en það verður örugglega íþróttatengt. Handbolti, fótbolti... eða eitthvað. Maður veit samt aldrei hvernig málin þróast.

Þorbjörn Garðar
Er mögulegt að þú spilir handbolta aftur í framtíðinni?
Það er mikill möguleiki finnst mér. Ef maður dettur hinumegin við línuna varðandi fótboltann og nennir þessu skyndilega ekki lengur gæti maður tekið upp eitthvað annað. Þá kemur handboltinn til greina en það yrði væntanlega einhver bumbubolti.

Ragnar Olsen
Ert þú ekki alltaf að fara að henda þér í þjálfun eftir ferilinn?
Eins og er þá er það planið. Ég er búinn með eina þjálfaragráðu og það er áhugi til staðar. En maður veit aldrei hvort áhuginn verði farinn þegar maður hættir.

Rósey Björgvinsdóttir
Lætur þú ananas á pizzu?
Nei.

Brynjar Ellertsson
Hver er erfiðasti andstæðingurinn þinn?
Það var alltaf Michael Ballack eftir að ég mætti honum með Coventry gegn Chelsea í bikarnum. Svo verð ég að velja frönsku miðjuna, við áttum ekki möguleika gegn þeim í fyrri hálfleik á EM. Þeir yfirspiluðu okkur í rauninni.

Róbert Þormar
Hver er besti vinur þinn í landsliðinu og hjá félagsliði?
Rúrik í landsliðinu, við höfum verið herbergisfélagar í einhver tíu ár. Hjá félagsliðinu myndi ég segja Sean Morrison, fyrirliðinn okkar.

Sigurjón Björnsson
Hver var fyrirmynd þín í fótboltanum?
Maður horfði alltaf til Paul Scholes. Þegar maður var farinn að verða dýpri á miðjunni fór maður í Makelele. Maður stúteraði talsvert hvernig þeir tveir spiluðu.

Sigurbaldur Frímannsson
Hefðir þú Aron getið orðið jafn góður og Aron bróðir þinn í handbolta?
Er þetta spurning frá honum sjálfum?... hugsanlega hefði ég getað það. Við erum öðruvísi leikmenn en erum líkir á velli eins og við spilum fyrir landsliðin. Ég veit ekki hvort við værum jafngóðir sem handboltamenn, við værum öðruvísi leikmenn.

Heiðar Ólafsson
Fyrir utan Þór Akureyri, hvaða lið myndirðu helst spila fyrir á Íslandi?
Ég verð eiginlega að segja Breiðablik. Ég æfi alltaf með þeim þegar ég fer heim. Mér finnst þetta flott félag og hef alltaf sóst til þeirra þegar ég er heima á Íslandi og þarf að halda mér í formi.

Sveinn Ragnarsson
Hvaða aðra stöðu á vellinum gætiru séð sjálfan þig spila fyrir utan varnasinnaðan miðjumann?
Ég gæti spilað sem miðvörður seinna meir held ég. Ég held að ég yrði ekkert frábær, það vantar aðeins hæðina. En af öllum öðrum stöðum held ég að ég gæti leyst miðvörðinn best.

Ragnar Bogi
Hverjir eru draumamótherjar þínir á HM?
Maður væri til í að spila á móti Brasilíu, stærstu fótboltaþjóð í heimi. Það væri gaman að spila á móti þeim en það yrði virkilega erfitt.

Marc Boal
Heldur þú að þú endir ferilinn á því að spila í Pepsi-deildinni á Íslandi?
Nei... ég held ekki. Ég ætla samt ekkert að útiloka það. Það eru minni líkur en meiri.

Eldar Daníelsson
Uppáhalds morgunmatur?
Hafragrautur. Hann hefur verið að koma sterkur inn.

Arnór Karlsson
Áttu sjúklega flottan kagga?
Ég á bara einhvern venjulegan BMW sem kemur mér á milli staða.

Ragnar Freyr
Verður þú ekki örugglega með víkingaskeggið á HM?
Ég ætla að vera með skegg. Ég veit ekki hvort ég hafi þolinmæði fyrir því að hafa það langt en það er allavega planið að vera með skegg.

Kristinn Ágústsson
Var það sjálfstæð ákvörðun eða skipaði konan þér að raka EM skeggið af?
Það var sjálfstæð ákvörðun. Ég var kominn með nóg! Hún hvatti mig til að safna í EM skeggið.

Andri Tryggvason
Hver er besti leikmaður sem þú hefur spilað með?
Eiður Smári. Ég spilaði með honum þegar hann var í Barcelona og það var gæðaleikmaður.

Garðar Jónasson
Ertu með einhver ráð fyrir unga leikmenn sem skortir tæknilega getu?
Það er hægt að bæta skort á tæknilegri getu upp með einhverju öðru, til dæmis vilja og karakter. Ég sjálfur er langt frá því að vera tæknilega bestur í landsliðinu. Auðvitað er hægt að vinna í að bæta tæknilega getu með aukaæfingum og fleiru. Það er bara um að gera að æfa meira en aðrir.

Aron Pétursson
Hvernig er best að þjálfa sig í því að taka löng innköst?
Ég lyfti alltaf þannig að ég styrkti bak og upphandleggi varðandi löngu innköstin. Svo æfði ég mig oft með því að kasta bolta í vegg þegar ég vissi að þetta væri vopn sem ég gæti nýtt mér. Það hjálpaði einnig að hafa spilað handbolta þegar ég var yngri.

Maren Steindórsdóttir
Hvaða þætti ertu að horfa á og hvaða þáttum mælir þú með?
Ég er að horfa á Suits. Ég er kannski langt á eftir, það gefst ekki gígantískur tími í það. Ég mæli með Sons of Anarchy, ég er búinn með þær seríur.

Guðmundur Daði
Hver er skemmtilegasti staður sem þú hefur farið til?
Maldíveyjar. Það er voðalega rólegt og þægilegt þar.

Árni Þór Gunnarsson
Hvernig finnst þér lagið þitt sem er gjarnan sungið á landsleikjum (Krummi svaf í klettagjá)?
Ég hef gaman að því. Það hefur verið í dágóðan tíma og náð að festa sig vel. Ég kann að meta það.

Ísak Bergmann
Fylgist þú með Enska á Snapchat?
Já það geri ég. Hann er náttúrulega Akureyringur mikill.

Pétur Daníels
Uppáhalds markið þitt?
Tékkland heima. Kom okkur á bragðið fannst mér í þessum leik og var mikilvægt upp á framhaldið að gera. Þetta var kannski ekki flottasta markið mitt en uppáhalds.

Gunnar Bjarki Helgason
Ertu stressaður fyrir einhverja leiki?
Ekki lengur. Ég var það. Ég fæ alveg enn í magann fyrir landsleiki og hef alltaf gert það. Við erum alltaf að spila stóra leiki.

Aron Pétursson
Hvar í ensku úrvalsdeildinni telur þú að íslenska landsliðið væri statt ef það væri að taka þátt þar?
Í miðjuhnoði held ég. Þetta er mjög erfið deild en við höfum skipulag og stöðugleika í okkar leik. Ég hef trú á því að við værum um miðja deild.

Ólafur Valur
Hvað telur þú þig eiga mörg ár eftir í atvinnumennsku?
Sjáum bara hvað líkaminn leyfir. Planið var alltaf 35 en maður veit aldrei. Kannski næ ég fleiri árum en meiðsli gætu aftrað manni eitthvað.

Eiður Sigurbjörnsson
Hvernig tónlist hlustar þú mest á fyrir leiki?
Ég er mikið í íslenska rappinu. Það kemur mér í gang. Annars er ég alæta á tónlist.

Albert Hafsteinsson
Hvaða þrjá leikmenn í landsliðinu myndiru taka með þér á eyðieyju?
Þessi er góð. Ég myndi taka Óla Inga til að halda uppi stuðinu, hann er með góðar sögur. Ég verð að taka Rúrik, annars fer hann í fýlu. Svo myndi Alfreð koma með og sjá um okkur hina. Hann myndi setja eyðieyjuna upp í Excel.

Kristinn Halldórsson
Ef þú mættir velja þér einn ofurhetjumátt, hvaða máttur yrði fyrir valinu?
Ef ég mætti fljúga eins hratt og ég vildi þá myndi ég velja það.

Sveinbjörn Helgason
Ef leiðir við enska boltann myndu skilja hvaða deild myndir þú helst vilja spila í?
Ég hef pælt mikið í þessu. Tyrkland heillar mig aðeins. Það er hiti og læti í áhorfendunum. Ítalía heillar mig líka.

Sölvi Haraldsson
Hvernig kom það til að þú varðst fyrirliði íslenska landsliðsins?
Lars ákvað það á sínum tíma þegar þessi kynslóðaskipti áttu sér stað. Fyrir vináttulandsleik gegn Frökkum úti (2012) sá ég bara uppi á töflu að ég væri fyrirliði. Síðan þá hef ég verið fyrirliði. Hann sagði síðar að hann hefði verið að líta til framtíðar þegar hann valdi fyrirliða.

Ragnar Olsen
Er það satt sem Eiður Smári sagði? Varstu farinn að rífa kjaft við hann þegar þú komst inn í landsliðið í fyrsta skipti?
Já... eða rífa kjaft. Ég var með derring sem ungir peyjar ættu kannski ekki að vera með. Hann var kannski ekki vanur því að átján ára strákur væri að reyna að segja honum til. Ég hef bara alltaf verið svona sem leikmaður. Ég skil vel að hann hafi hugsað þetta á sínum tíma en hann fyrirgaf mér þetta alveg!

Ragnar Olsen
Myndirðu biðja Ronaldo aftur um treyjuna eftir leik ef við mætum þeim á HM 2018?
Nei ég held ekki. Ég fékk svo mikið drull á mig hérna í hópnum að ég held að ég myndi láta það vera.

Sigurður Enoksson
Hvort er nú meira áreiti i Englandi (Wales) eða á Íslandi?
Það eru fleiri á Íslandi sem vita hver maður er.

Gunnar Bjarki Helgason
Við hvað myndir þú vinna við ef þú værir ekki fótboltamaður?
Ég væri sennilega í handbolta. Það var alltaf planið að vera íþróttamaður. Ef ekkert hefði verið af íþróttaferlinum þá hefði maður væntanlega lært eitthvað í skóla og unnið út frá því.

Júlíus Mar
Hvað ertu með mörg húðflúr?
Ég er búinn að missa töluna. Ég er með húðflúr nánast út um allt; það er á höndunum, brjóstkassanum og bakinu. Ég veit ekki hvort maður telur þetta allt saman sem eitt? Ég á örugglega eftir að fá mér fleiri.

Ólafur Ingi Skúlason
Nú ert þú mikill lífsnjótari Aron, hvar rankar dagurinn í eyðimörkinni á gulu þrumunni í lífi þínu?
Topp fjórir bestu dagar lífs míns! Þetta var frábært fyrir utan það þegar Óli var næstum búinn að velta okkur.

Máni Valsson
Er satt að Emmsjé Gauti hafi borðað fimm þúsund kall í steggjuninni þinni?
Gauti var ekki í steggjuninni minni, hann var í fríi í útlöndum.

Ívar Jónsson
Hefur aldrei blundað í þér vilji til þess að taka aukaspyrnur liðsins?
Ég læt aðra um það. Ég sé um eitthvað annað. Ég veit mín takmörk.

Sara Finnsdóttir
Hver er flippaðastur í landsliðinu?
Óli Ingi, það er gaman að honum.

Haukur Þorkelsson
Ef þú færð frídag í boltanum. Hvernig nýtirðu hann?
Með fjölskyldunni; með konunni og Ólíver.

Gísli Sveins
Hvaða leik i undankeppninni var mest gaman að spila?
Króatía heima. Við áttum harma að hefna og höfðum ekki unnið þá. Við þurftum að vinna og héldum þeim alveg í skefjum. Við skoruðum á síðustu mínútu og vorum svo komnir í sumarfrí. Þetta gat ekki verið betri.

Jón Bragi
Hver er þín uppáhalds HM keppni til þessa?
Ég er frekar gleymin týpa og ætla að segja að það sé Brasilía 2014.

Þorsteinn Marteins
Hver var þinn uppáhalds landsliðsmaður þegar þú varst yngri?
Heiðar Helgu. Ég verð að fá að henda hans nafni inn í þetta. Gæji sem gaf ekkert eftir. Toppeintak innan sem utan vallar.

Sjá einnig:
Gylfi svarar spurningum lesenda