„Þetta er frábær leikmaður. Hann er jafnfættur og tekur virkilega mikið til sín, á jákvæðan hátt. Það er oft talað svona um leikmenn sem skora ekki en hann skorar," sagði Freyr við Fótbolta.net í dag aðspurður út í Tosun.

„Hann leggur upp mörk, er ósérhlífinn og fer í návígi. Hann er ekkert sérstaklega hávaxinn en hann er fínn í loftinu."

„Ég hef trú á því að stóri Sam geti náð því besta úr honum. Maður veit ekki hvernig enskan hjá honum er og hvernig hann mun aðlagast ensku deildinni en þessi strákur hefur alla hæfileika til að standa sig vel."

Everton hefur ekki náð að fylla skarð Romelu Lukaku í fremstu víglínu en hann fór til Manchester United í sumar. Gylfi Þór Sigurðsson bættist í hópinn hjá Everton í sumar og hann telur að Tosun geti smollið vel saman með honum.

„Ef að Gylfi fær að spila sem tía þá er þetta frábært fyrir hann. Hann (Tosun) tekur mikið til sín, ýtir varnarlínunni niður og er tilbúinn að hlaupa og djöflast. Ég gæti trúað því að þetta muni nýtast Gylfa vel," sagði Freyr að lokum.