„Við vorum búnir að bíða ansi lengi eftir þessum sigri," segir Jóhann Berg Guðmundsson landsliðsmaður en Fótbolti.net ræddi við hann í morgun.

Burnley vann 2-1 sigur gegn Everton þar sem Jóhann lagði upp mark en liðið hafði ekki unnið deildarleik síðan í desember þegar kom að þessum leik.

„Það var löngu kominn tími á þetta. Það var þreytandi að hafa ekki unnið lengi. Við lentum undir þrátt fyrir að hafa verið að spila mjög vel, mér fannst við ekki verðskulda að vera undir."

„Við vorum ekkert of stressaðir yfir því að vera undir og þjálfarinn sagði við okkur í hálfleik að það kæmu tveir fram og við myndum keyra aðeins meira á þá. Hann sagði okkur það líka að við hefðum aldrei komið til baka eftir að við værum 1-0 undir svo það væri tími til að gera það. Við spiluðum mjög vel eftir það."

Jóhann Berg og félagar höfðu því betur í Íslendingaslagnum gegn Gylfa og félögum en Burnley er í sjöunda sæti.

„Mikilvægast er að hafa náð í þessu þrjú stig og ná loksins að landa sigri. Við höfum verið frábærir á tímabilinu þó þessir síðustu tíu leikir höfðu reynst okkur erfiðir," segir Jóhann.

Sjáðu viðtalið í heild sinni í sjónvarpinu hér að ofan en nánar verður rætt við Jóhann á Fótbolta.net í þessari viku.

Tweet

Senda a Facebook Hafdu samband Senda frétt Prenta frétt Frétta leit