Heimild: Vísir 

KR sendi stjórn KSÍ athugasemdir áður en tekin var sú ákvörðun að leikurinn yrði spilaður þann 22. ágúst, sem er á morgun. Það er því ekki mikill tími til stefnu.

Aga- og úrskurðarnefnd KSÍ hafnaði í gær kröfu KR þess efnis að liðinu yrði dæmdur sigur í leiknum og KR hefur í kjölfarið áfrýjað til áfrýjunardómstólsins.

Haukur Hinriksson, yfirlögfræðingur KSÍ, segir við Vísi að málið sé í ferli og að stefnt sé að því að klára það fyrir dagslok.

„Það barst áfrýjun frá knattspyrnudeild KR í morgun, um níuleytið. Sú áfrýjun var strax sett í ferli. Varnaraðilum í málinu, stjórn KSÍ og HK, gefinn frestur til að andmælum eða taka til varnar í málinu til klukkan þrjú í dag,“ segir Haukur.

„Svo mun dómstóllinn koma saman seinni partinn í dag og taka málið fyrir. Svo hugsanlega ná að klára málið í kvöld eða fyrramálið.“

Í úrskurði aga- og úrskurðarnefndar KSÍ segir að krafa KR hafi ekki viðhlítandi stoð í lögum- eða reglugerðum KSÍ.

Samkvæmt grein 15.6 í reglugerð KSÍ um knattspyrnumót segir að ef leikur getur ekki farið fram vegna veðurs, ástands vallar eða annarra óviðráðanlegra orsaka skuli „hann fara fram næsta dag sem fær þykir og við verður komið“ hafi hann ekki verið flautaður á.

Að öllu óbreyttu verður leikur HK og KR annað kvöld klukkan 20 í Kórnum.