Villa fékk Iling Jr í skiptidíl við Juventus í sumar. Villa fékk enska leikmanninn og Enzo Barrenechea en Douglas Luiz fór í hina áttina.

Iling Junior er tvítugur leikmaður sem lék 45 leiki á tveimur tímabilum sínum með aðalliði Juventus, en Unai Emery, stjóri Villa, telur sig ekki hafa not fyrir hann á þessari leiktíð.

Hann var ekki í hópnum gegn West Ham í fyrstu umferð ensku úrvalsdeildarinnar og var útskýring á því. Hann er nefnilega á leið til Bologna á láni út tímabilið.

Bologna greiðir laun kappans en ekkert kaupákvæði er í samningnum.

Iling Junior ferðast til Bologna á sunnudag til að gangast undir læknisskoðun áður en hann skrifar undir. Þetta segir Fabrizio Romano á X.

Bologna og Aston Villa leika bæði í Meistaradeild Evrópu á þessu tímabili. Villa hafnaði í 4. sæti ensku úrvalsdeildarinnar á síðasta tímabili á meðan Bologna hafnaði í 5. sæti Seríu A, en ítalska deildin fékk fimm sæti í deildarkeppni Meistaradeildarinnar.