Þessi 29 ára gamli leikmaður hefur eytt síðustu tveimur tímabilum á láni í ensku úrvalsdeildinni, en fyrra tímabilið spilaði hann með Tottenham og þá lék hann með Aston Villa á síðustu leiktíð.

Frakkinn er ekki í myndinni hjá Hansi Flick og hefur því fengið að yfirgefa félagið á láni.

Fabrizio Romano sagði frá því í dag að Atlético Madríd væri búið að ná samkomulagi við Barcelona um að fá Lenglet á láni út tímabilið.

Atlético mun greiða stærstan hluta launa leikmannsins á tímabilinu, en þarf ekki að greiða sérstaklega fyrir lánið. Ekkert kaupákvæði er í samningnum.

Lenglet framlengdi um leið samning sinn við Barcelona til 2027, en hann mun nú halda í læknisskoðun hjá Atlético áður en hann verður kynntur.