Leeds United vann fyrsta leik sinn í ensku B-deildinni á þessu tímabili er liðið lagði Sheffield Wednesday að velli, 2-0, á Hillsborough-leikvanginum í Sheffield í kvöld.

Leedsarar höfðu tapað einum og gert eitt jafntefli í fyrstu tveimur leikjum tímabilsins á meðan Wednesday hafði unnið einn og tapað einum.

Bandaríski landsliðsmaðurinn Brenden Aaaronson kom Leeds yfir á 24. mínútu eftir stórkostlega sókn. Sóknin byrjaði hjá Illan Meslier, markverði Leeds og eftir frábært samspil komst Mateo Joseph einn í gegn.

Varnarmaður Wednesday braut á honum og fór boltinn til Aaronson sem afgreiddi boltann í netið.

Annað mark Leeds var ekki síðra. Joseph átti stórkostlega stungusendingu inn fyrir á Daniel James sem komst einn á móti marki. Hann var rólegur fyrir framan markið, beið eftir að markvörður Wednesday lagðist í grasið áður en hann vippaði honum yfir hann og í markið.

Góður 2-0 sigur hjá Leeds sem er komið upp í 4. sæti B-deildarinnar með 5 stig en Wednesday með 3 stig í 13. sæti.