Fjölniskonur léku sér að KH er liðin áttust við í B-úrslitum 2. deildar kvenna á Hlíðarenda í kvöld.

María Sól Magnúsdóttir gerði sér lítið fyrir og skoraði fjögur mörk í leiknum, en hún er nú komin með tíu mörk í úrslitakeppninni og var þetta þá önnur fernan sem hún skorar á síðustu tveimur vikum.

Í fyrstu umferð B-úrslita gerði hún fjögur gegn Augnabliki og þá gerði hún tvö í síðasta leik gegn Sindra. María er aðeins 16 ára gömul og er þegar komin með sextán mörk í sautján leikjum (deild- og bikar) með meistaraflokki Fjölnis.

Emilía Lind Atladóttir skoraði tvö fyrir Fjölni í kvöld og þá komust þær Freyja Dís Hreinsdóttir og Oliwia Bucko einnig á blað.

Fjölnir í efsta sæti B-úrslita með 29 stig þegar þrjár umferðir eru eftir. KH er í öðru sæti með 20 stig.