Það komu nokkrir Íslendingar við sögu í leikjum dagsins víða um Evrópu, þar sem Elías Rafn Ólafsson varði mark Midtjylland í Íslendingaslag gegn Sönderjyske í efstu deild danska boltans.
Daníel Leó Grétarsson og Kristall Máni Ingason voru í byrjunarliði gestanna en tókst ekki að koma í veg fyrir tap.
Midtjylland hafði betur í fimm marka leik og eru Elías Rafn og félagar á toppi deildarinnar með 14 stig eftir 6 umferðir. Sönderjyske er aðeins komið með 4 stig.
Í þriðju efstu deild enska boltans byrjuðu Willum Þór Willumsson og Alfons Sampsted báðir á varamannabekknum hjá Birmingham í sigri á útivelli gegn Leyton Orient.
Staðan var 1-2 í hálfleik og fékk Willum að spila síðustu 40 mínúturnar, en lokatölurnar stóðu í 1-2. Íslendingaliðið er komið með sjö stig eftir þrjár fyrstu umferðirnar á nýju tímabili eftir fall úr Championship deildinni á síðustu leiktíð.
Að lokum var Sveinn Aron Guðjohnsen ónotaður varamaður í jafntefli Hansa Rostock gegn varaliði Borussia Dortmund í þriðju efstu deild þýska boltans.
Midtjylland 3 - 2 Sonderjyske
Leyton Orient 1 - 2 Birmingham
Hansa Rostock 1 - 1 Borussia Dortmund II
Athugasemdir
