„Þetta var einn af þeim verri sem maður hefur upplifað," sagði Jóhann Kristinn Gunnarsson þjálfari Þór/KA eftir dramatískt tap gegn Val á Akureyri í kvöld.
Lestu um leikinn: Þór/KA 1 - 2 Valur
„Okkur fannst það ekki slæmt að þetta hafi verið lokað og læst, hægt og þungt í fyrri hálfleik. Við vorum að gera full mikið af feilum en ég er gríðarlega ánægður með seinni hálfleikinn hjá mínu liði. Hann verðskuldaði að fá eitthvað út úr þessum leik, ef ekki þrjú þá að minnsta kosti eitt."
„Svona er þetta oft þegar þú ert að spila gegn liðum sem hafa svona marga X faktora, þá getur þetta farið eins og þetta fór," sagði Jóhann Kristinn.
Þór/KA fékk svo sannarlega færin til að bæta við mörkunum.
„Það er óheppilegt að þetta hafi raðast svona að þessi góðu færi sem fóru forgörðum hafi öll farið forgörðum gegn þessu liði því það þarf yfirleitt allt að ganga upp ef þú ætlar að vinna svona lið. En það man enginn eftir því þegar frá líður. Þetta snýst bara um að Valur tók öll þrjú stigin og við fengum ekki neitt," sagði Jóhann Kristinn.
Næsti leikur liðsins er strax á föstudaginn í undanúrslitum Mjólkurbikarsins gegn Breiðabliki á Akureyri.
„Það er alltof stutt í hann. Þetta er of þungt prógramm en nú er bara að nota öll þau tól og tæki og fólk til að koma stelpunum í eins gott stand, endurheimta orku og jafna sig fyrir leikinn á föstudaginn. Undanúrslit í bikar eru alltaf spennandi, við þurfum bara að setja fókusinn á það," sagði Jóhann Kristinn.