Ederson, markvörður Manchester City, vísar grein The Athletic á bug þar sem talað er um að Brasilíumaðurinn sé óánægður hjá enska félaginu.
Skrifað var um í greininni að Ederson væri ósáttur við umfjöllunina sem Stefan Ortega varamarkvörður City fékk í lok síðasta tímabils en hann spilaði síðustu leiki liðsins vegna meiðsla Ederson.
„Ég vil koma því á framfæri að greinin sem The Athletic birti í gær um að ég væri óánægður með liðsfélaga minn er kolröng," skrifaði Ederson á samfélagsmiðla í dag.
Ederson meiddist í leik liðsins gegn Tottenham og fékk Ortega mikið hrós fyrir frammistöðu sína í leiknum eftir að hafa leyst Ederson af hólmi.
„Þessi dagur var án efa einn af þeim erfiðustu á mínum ferli. Meiðslin urðu til þess að ég gat ekki tekið þátt í endasprettinum á tímabilinu og einnig gat ég ekki tekið þátt á Copa America með þjóð minni."
Framtíð Ederson hjá Man City er í óvissu en hann er orðaður við lið í Sádí-Arabíu. Hann er mættur aftur til æfinga hjá City og lék í 4-3 tapi gegn Celtic á dögunum en liðið er í æfingaferð í Bandaríkjunum.