Gunnar Magnús Jónsson, þjálfari Fylkis, var skiljanlega vonsvikinn með leik síns liðs í dag þegar Fylkir fékk FH í heimsókn í 7. umferð Bestu deildar kvenna.
Lestu um leikinn: Fylkir 0 - 3 FH
„Gríðarleg vonbrigði. Ofboðslega svekktur og sár út í frammistöðuna og úrslitin. Við ætluðum okkur miklu meira og við settum þennan leik upp þannig að þetta væri mjög mikilvægur leikur fyrir okkur en við náðum því miður ekki að fylgja því eftir.“
FH byrjaði leikinn af miklum krafti og Fylkir var á afturfótunum strax á fyrstu mínútu leiksins.
„Við byrjuðum leikinn mjög illa, það er hárrétt. Eins og þú segir þá vorum við algjörlega á afturfótunum í upphafi. En eftir markið þá komu fínir kaflar og leit miklu betur út.“
Þar sem rúmlega þriðjungur af mótinu er búinn var Gunnar beðinn um að leggja sitt mat á frammistöðu liðsins og stigasöfnunina hingað til.
„Frammistaðan hefur löngum verið allt í lagi en eins og ég segi þá erum við ekki búin að safna nógu mörgum stigum, við þurfum að fara gera það. Við höfum bara í raun átt eina skíta frammistöðu og það var fyrir norðan. Margir leikmenn hér í dag sem eiga mikið inni og voru ekki að ná að sýna sitt besta.“
Viðtalið má sjá í heild sinni í spilaranum hér að ofan.