Franska stórveldið Paris Saint-Germain hafði unnið fyrstu fjóra deildarleikina á nýju tímabili í efstu deild franska boltans en það breyttist þegar liðið heimsótti Reims í kvöld.
Þar lenti PSG óvænt undir snemma leiks, þegar Keito Nakamura kom heimamönnum yfir strax á níundu mínútu.
Leikurinn var jafn og einkenndist af mikilli baráttu þar sem bæði lið áttu í miklum erfiðleikum með að skapa sér færi.
Gæðin í liði PSG fengu þó að njóta sín í síðari hálfleik þegar Joao Neves lagði upp jöfnunarmark leiksins fyrir Ousmane Dembélé á 68. mínútu.
Hvorugu liði tókst að gera sigurmark og var niðurstaðan 1-1 jafntefli í jöfnum slag.
PSG er á toppi deildarinnar með 13 stig eftir 5 umferðir, en Reims er komið með 8 stig.
Rennes gerði þá 1-1 jafntefli við Lens í dag eftir að Lille hafði gert 3-3 jafntefli við Strasbourg.
Lens gerði jöfnunarmarkið á 96. mínútu á útivelli gegn Rennes og er í fjórða sæti eftir jafnteflið. Lens er með 9 stig og á enn eftir að tapa deildarleik á tímabilinu.
Reims 1 - 1 PSG
1-0 Keito Nakamura ('9)
1-1 Ousmane Dembele ('68)
Rennes 1 - 1 Lens
1-0 Arnaud Kalimuendo ('24, víti)
1-1 Mbala Nzola ('96)
Athugasemdir
