Fótbolti.net ræddi við Böðvar Jónsson, formann fótboltadeildar Keflavíkur, og spurði hann út í tíðindi gærkvöldsins.

„Þetta var fyrst og fremst árangur liðsins sem við erum náttúrulega ekki ánægð með, höfum tapað leikjum sem við erum nánast með unna."

„Þetta var svipuð staða og í fyrra þegar við ákváðum að framlengja ekki við Sigga Ragga (þáverandi þjálfara karlaliðsins). Um leið og sú ákvörðun var tekin að hann yrði ekki áfram þá einhvern veginn brotnaði tengingin milli manna. Glenn var með samning út október og þegar gengur illa þá hinkra menn með að endurnýja samninginn. Niðurstaða stjórnar var svo sú að við myndum ekki lenda í sama hlut og í fyrra, þegar við ákváðum að hafa þjálfarann áfram, en þurftum svo að bakka með það. Úr því að við tókum þessa ákvörðun að endurnýja ekki samninginn þá ákváðum við að það væri eðlilegast að hann færi bara strax."

Guðrún Jóna Kristjánsdóttir, sem var aðstoðarþálfari Glenn, mun stýra liðinu út tímabilið en ekki er búið að taka ákvörðun um hver tekur svo við eftir tímabilið. Næsti leikur er gegn Tindastóli á sunnudag.

Fótbolti.net heyrði af því að Keflavík hefði reynt að fá Alexander Aron Davorsson til starfa en Böðvar sagði það ekki rétt.