Það var magnaður leikur í Bestu deildinni gær þar sem HK vann endurkomusigur gegn KR í Kórnum.
Leikurinn átti upphaflega að fara fram fyrir tveimur vikum en var frestað þar sem annað markið í Kórnum var brotið.
Lestu um leikinn: HK 3 - 2 KR
Leikurinn gat loksins farið fram í gær og hann var mikil skemmtun. KR var með tveggja marka forystu í hálfleik og með mikla yfirburði en dæmið snérist við í seinni hálfleik og HK vann að lokum.
Leifur Andri Leifsson, fyrirliði HK, sagði frá því í viðtali við mbl.is að það hafi mikið gengið á inn í klefa í hálfleik.
„Þetta var svo sannarlega leikur tveggja hálfleika. Við vorum gjörsamlega með þá í köðlunum í seinni hálfleik. Í fyrri hálfleik var þannig að við vorum bara hræddir, vorum ekki að hlaupa til baka og verjast. Í hálfleik var allt kolvitlaust í klefanum þar sem það var bara tekinn tryllingur og mönnum sagt að setja kassann út, fara maður á mann og elta þá út um allan völl," sagði Leifur.
„Ég vil bara hrósa liðinu fyrir að stíga svona svakalega upp. Það er ekki auðvelt að koma hérna út 2:0 undir á móti góðu liði eins og KR og halda þeim upp við sinn eigin vítateig nánast allan seinni hálfleik. Þetta var klárlega verðskuldað miðað við hvernig við spiluðum í seinni hálfleik.“
