AC Milan og Atalanta gerðu 1-1 jafntefli á San Síró í Seríu A í kvöld.

Portúgalski vængmaðurinn Rafael Leao skoraði fyrir Milan á 3. mínútu leiksins.

Það mark er vel hægt að tilnefnda til verðlauna sem mark tímabilsins í Seríu A, en hann lék á tvo leikmenn á vængnum áður en hann skoraði með föstu innanfótarskoti og yfir markvörð Atalanta og í netið.

Teun Koopmeiners jafnaði fyrir Atalanta úr vítaspyrnu eftir að Olivier Giroud sparkaði í höfuð leikmanns undir lok fyrri hálfleiks. Koopmeiners skoraði af öryggi en hann skoraði einnig úr víti í bikarnum gegn Milan fyrir tæpum tveimur mánuðum.

Davide Calabria, Christian Pulisic, Leao og Giroud fengu allir færi til að ganga frá leiknum í síðari hálfleik, en Marco Carnesecchi átti leik lífs síns og sá til þess að sækja stigið fyrir gestina.

Milan er í 3. sæti með 53 stig en Atalanta í 5. sæti með 46 stig.