Spáin:
1. ?
2. ?
3. ?
4. ?
5. Stjarnan, 62 stig
6. Þróttur R., 60 stig
7. Víkingur R., 45 stig
8. Tindastóll, 25 stig
9. Fylkir, 22 stig
10. Keflavík, 14 stig

Um liðið: Eins og áður kemur fram þá var Stjörnunni spáð efsta sæti fyrir síðustu leiktíð en liðið endaði að lokum í fjórða sæti. Stjörnuliðið var lengi að finna taktinn eftir frábært undirbúningstímabilið og sumarið var ekki sérlega jákvætt. Í vetur hafa orðið miklar breytingar á liðinu og trú sérfræðinga er ekki eins mikil á þeim bláu úr Garðabænum. Eiga þær eftir að afsanna spánna?

Þjálfarinn: Kristján Guðmundsson heldur áfram utan um stjórnartaumana í Garðabænum. Hann hefur sannað það margoft að hann er frábær þjálfari. Hann er með mikla reynslu og hefur komið víða við á sínum þjálfaraferli. Hann gerði karlalið Keflavíkur að bikarmeisturum 2006 og varð færeyskur meistari með HB árið 2010. Hann tók við Stjörnunni eftir tímabilið 2018 og hefur verið að byggja upp liðið. Síðasta sumar var vonbrigði en hann fékk nýjan samning hjá Stjörnunni til 2025 og mun halda áfram með verkefnið.

Fótbolti.net fær sérfræðingana Jón Stefán Jónsson og Lilju Dögg Valþórsdóttur til að rýna í styrkleika, veikleika og annað hjá liðunum sem spila í Bestu deildinni í sumar. Lilja Dögg, sem er fyrrum leikmaður Vals, KR og fleiri félaga fer yfir það helsta hjá Stjörnunni.

Mynd: Fótbolti.net - Hafliði Breiðfjörð

Styrkleikar: Liðið hefur spilað þéttan og agaðan varnarleik undanfarin ár og ég geri ekki ráð fyrir að það verði nokkur breyting þar á. Það hafa vissulega orðið einhverjar breytingar á varnarlínunni sjálfri þar sem sterkir leikmenn, Sædís Rún og Málfríður Erna, eru horfnir á braut en liðið á bæði unga, efnilega leikmenn og hefur styrkt sig með varnarmönnum svo Kristján hefur sennilega ekki teljandi áhyggjur af því. Kristján er líka reyndur þjálfari og hefur eflaust gaman að áskoruninni sem hann stendur frammi fyrir núna, að móta liðið upp á nýtt eftir brotthvarf nokkurra stórra pósta síðustu tímabil. En heilt yfir er liðið skipulagt og er vel samsett af eldri, reyndari leikmönnum í bland við unga og efnilega leikmenn.

Veikleikar: Sóknarleikur liðsins var hausverkur á síðasta tímabili og ég á erfitt með að sjá að það sé komin einhver lausn á því á þessu undirbúningstímabili. Liðið hefur misst nokkra leikmenn sem hafa verið mikilvægir sóknarlega eins og Jasmín Erlu, Sædísi Rún, Betsy Hassett, sem er ólétt, Heiðu Ragneyju og þá eru nýjustu fréttirnar þær að Gunnhildur Yrsa verði ekki með á tímabilinu þar sem hún er ólétt. Þá er mikill missir af spyrnum Sædísar Rúnar í föstum leikatriðum. Mér hefur oft þótt liðið frekar þunglamalegt í sínum sóknartilburðum og 'transition' hjá þeim vera frekar hægt. Þetta hefur komið niður á markaskoruninni og það er ákveðið vandamál að markahæstu leikmenn síðasta tímabils voru miðjumenn. Hulda Hrund Arnarsdóttir nær vissulega heilu tímabili með liðinu núna eftir að hafa komið til liðsins á miðju síðasta tímabili. Hún hefur getu til að verða leiðandi markaskorari fyrir liðið og vonandi gengur það eftir.

Lykilmenn: Það er nú varla hægt að tala um Stjörnuna án þess að minnast á Önnu Maríu Baldursdóttur, fyrirliða liðsins, í sömu setningu, svo samtvinnað er þetta tvennt. Ákaflega reynslumikill, traustur og yfirvegaður leikmaður og hefur alla þá eiginleika sem góðum leiðtoga sæmir. Ef allt gengur að óskum verður hún næsti leikmaður deildarinnar sem fer yfir 200 leikja múrinn og kemst þá í hóp um það bil 20 leikmanna sem hafa náð þeim árangri. Andrea Mist Pálsdóttir er einnig gríðarlega reynslumikill leikmaður sem verður gríðarlega mikilvægur hlekkur inná miðsvæðinu. Það er búið að vera svolítið flakk á henni undanfarin ár en hún er nú að koma inn í sitt annað tímabil með Stjörnunni og hún fellur vel inní liðið. Hún hefur líka sýnt að það eru mörk í henni og hún verður að nýta færin sín vel í sumar. Hulda Hrund Arnarsdóttir er kraftmikill, hraður og ákveðinn sóknarmaður sem er óhrædd við að taka menn á. Það mun mæða mikið á henni í framlínu liðsins og ég geri ráð fyrir að hún muni þurfa að draga vagninn sóknarlega og í markaskorun.

Leikmaður sem á að fylgjast með: Eyrún Embla Hjartardóttir er svo sem enginn nýgræðingur í efstu deild þar sem hún er að nálgast 30 leiki sem dreifast yfir síðustu 3 tímabil. En þeim hefur farið fjölgandi ár frá ári síðan hún kom til Stjörnunnar fyrir tímabilið 2021 og á sama tíma hefur hún spilað fjöldann allan af leikjum fyrir yngri landsliðin okkar. Með brotthvarfi leikmanna úr varnarlínu Stjörnunnar er alveg möguleiki á að Eyrún fái stærra hlutverk en áður. Hún gæti því orðið næsti Snæfellingurinn sem fær að blómstra í liði Stjörnunnar eftir að Sædís Rún hélt í atvinnumennsku.

Komnar:
Caitlin Cosme frá Bandaríkjunum
Hannah Sharts frá Finnlandi
Esther Rós Arnarsdóttir frá FH
Henríetta Ágústdóttir frá HK
Heiðdís Emma Sigurðardóttir frá Gindavík (var á láni)
Jóhanna Melkorka Þórsdóttir frá Fram (var á láni)

Farnar
Heiða Ragney Viðarsdóttir í Breiðablik
Jasmín Erla Ingadóttir í Val
Málfríður Erna Sigurðardóttir í Val
Sædís Rún Heiðarsdóttir til Noregs
Eyrún Vala Harðardóttir í Fram (var á láni hjá HK)
Snædís María Jörundsdóttir í FH

Dómur Lilju fyrir gluggann: Framan af leist mér ekki á blikuna í Garðabænum, fannst voðalega lítið vera að gerast í leikmannamálum. Liðið virtist missa hvern mikilvæga leikmanninn á fætur öðrum en “komnar” listinn var frekar fátæklegur. Það skal þó sagt að ég held að Esther geti nýst liðinu vel í sóknarleiknum og Henríetta er efnilegur leikmaður sem verður gaman að fylgjast með. En nú rétt fyrir mót komu fréttir úr herbúðum Stjörnunnar um tvö nýja erlenda leikmenn, Hannah Sharts og Caitlin Cosme. Það sem kom kannski mest á óvart þar var að þær eru báðar varnarmenn. Þarna hefði verið sterkt að sjá liðið sækja sér hreinræktaðan sóknarmann. En miðað við leikmannahópinn þá er kannski óhætt að gera ráð fyrir að önnur þeirra sé mögulega hugsuð inn á miðsvæðið. Það er erfitt að segja. En svona heilt yfir virkar þetta ekkert sérstaklega góður gluggi, fær 4 í einkunn en hér er kjörið tækifæri fyrir Kristján til að troða sokk upp í mig!

Fyrstu fimm leikir Stjörnunnar:
22. apríl, Stjarnan - Víkingur R. (Samsungvöllurinn)
27. apríl, Keflavík - Stjarnan (HS Orku völlurinn)
3. maí, Stjarnan - Tindastóll (Samsungvöllurinn)
8. maí, Breiðablik - Stjarnan (Kópavogsvöllur)
14. maí, Stjarnan - FH (Samsungvöllurinn)

Í besta og versta falli: Væntingarnar voru miklar í fyrra en svo koðnaði liðið algjörlega niður á fyrri hluta tímabilsins. Þær náðu sér þó aðeins á strik á seinni hlutanum og ef þær ná aftur upp stemmingu og skora aðeins fleiri mörk þá gætu þær alveg endað í 3. sætinu. Ég held samt að liðið verði ekki nægilega sterkt til að gera atlögu að efstu tveimur sætunum. Ef allt fer í skrúfuna þá gæti liðið dottið í sama pakka og í fyrra en ég held samt að liðið muni alltaf enda í efri hlutanum fyrir skiptingu.

Spámennirnir: Alexandra Bía Sumarliðadóttir, Elíza Gígja Ómarsdóttir, Guðmundur Aðalsteinn Ásgeirsson, Hulda Mýrdal, Lilja Dögg Valþórsdóttir, Mist Rúnarsdóttir, Orri Rafn Sigurðarson, Stefán Marteinn Ólafsson, Sverrir Örn Einarsson, Sæbjörn Þór Þórbergsson, Steinke.

Athugasemdir