Þýska deildin er farin af stað og Glódís Perla Viggósdóttir var á sínum stað í byrjunarliði Bayern þegar liðið lagði Potsdam af velli.
Sænska landsliðskonan Linda Sembrant sem gekk til liðs við félagið á láni frá Juventus í janúar gekk alfarið til liðs við félagið í sumar. Hún skoraði bæði mörk liðsins í 2-0 sigri í dag.
Þetta var fyrsti leikur umferðarinnar en henni lýkur á mánudaginn þegar Sveindís Jane Jónsdóttir og stöllur í Wolfsburg taka á móti Werder Bremen.
Alexandra Jóhannsdóttir byrjaði á bekknum þegar Fiorentina lagði Napoli í fyrsta leik ítölsku deildarinnar en hún spilaði síðustu 25 mínúturnar. Sigurmarkið kom andartaki eftir að Alexandra kom inná.
Selma Sól Magnúsdóttir lék allan leikinn þegar Rosenborg tapaði 1-0 gegn Lyn í norsku deildinni. Rosenborg er í 2. sæti eftir 19 umferðir með 37 stiig 17 stigum á eftir toppliði Valerenga sem hefur spilað 20 leiki.
