Spá Fótbolta.net - 11. sæti: ÍA

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ÍA 23 stig
12. Leiknir 14 stig

Um liðið: Skagamenn breyttu aðeins um gír í fyrra og leikir þeirra voru oft á tíðum óútreiknanlegir. Þeir skoruðu mikið en vörnin var líka opin og mikið skorað. Á endanum var áttunda sætið niðurstaðan. Það hefur verið ákveðin tiltekt á Skaganum bak við tjöldin og fjárhagsstaða ÍA hefur verið löguð, meðal annars með sölu á leikmönnum.



Þjálfari - Jóhannes Karl Guðjónsson: Skagamaður út í gegn og er á leið í sitt fjórða tímabil sem þjálfari liðsins. Metnaðarfullur þjálfari sem er trúr sinni sannfæringu. Steig sín fyrstu skref sem aðalþjálfari hjá HK og var valinn þjálfari ársins í 1. deildinni árið 2017.

Styrkleikar: Jói Kalli hefur verið lengi með liðið og leikmenn ættu að þekkja sín hlutverk 100%. Beinskeytt og kraftmikið lið. Þeir breyttu leikstílnum á síðasta tímabili á kostnað varnarleiksins en búast má við þeim varnarsinnaðri í ár. ÍA er með marga leikmenn sem eru uppaldir og fótboltamenningin á Akranesi er þannig að mikill áhugi er á liðinu og stuðningsmenn eru kröfuharðir.

Veikleikar: Bestu leikmenn liðsins eru horfnir á braut. Stefán Teitur Þórðarson og Tryggvi Hrafn Haraldsson eru farnir úr gula búningnum og þeir skilja eftir sig skörð sem verður ákaflega erfitt að fylla. Þeir hafa misst lykilmenn í sóknarleiknum og fróðlegt að sjá hvernig Hákoni Inga Jónssyni vegnar á Skaganum. Þá hefur varnarleikurinn ekki verið traustur og Árni Snær Ólafsson markvörður þurft að sækja boltann oft úr neti sínu. Hann fær harða samkeppni frá Dino Hodzic sem er kominn frá Kára.

Lykilmenn: Óttar Bjarni Guðmundsson og Ísak Snær Þorvaldsson. Breiðhyltingurinn Óttar er einn reynslumesti leikmaður ÍA og lykilmaður í hjarta varnarinnar. Hann og Skotinn Alex Davey mynda miðvarðaparið og mikilvægt að þeir muni ná vel saman. Miðjumaðurinn Ísak Snær heldur upp á tvítugsafmæli sitt meðan fyrsta umferð deildarinnar verður leikin. Skagamenn treysta á að þessi kraftmikili og líkamlega sterki leikmaður eigi gott sumar.

Fantabrögð mæla með í Draumaliðsdeild Eyjabita:
Þeir gulu eiga mjög vont leikjaprógram í byrjun móts en Hákon Ingi Jónsson blómstraði síðast undir stjórn Jóa Kalla og við spáum því að hann muni gera það aftur. Hann hlýtur að taka vítin í sumar eins og síðast þegar þeir Jói Kalli unnu saman, enda spyrnumaður góður. Gæti verið flottur þriðji sóknarmaður í Fantasy liðin.
Smelltu hér til að fara í Draumaliðsdeild Eyjabita

Hlaðvarpsþátturinn Ungstirnin mælir með: Gísli Laxdal Unnarsson. Kantmaður fæddur 2001 sem er uppalinn á Skaganum, steig sín fyrstu skref með ÍA seinasta sumar eftir að hafa verið í lykilhlutverki með öflugum 2. flokki ÍA. Gísli spilaði 17 leiki fyrir ÍA í Pepsi-Max deildinni síðasta sumar og skoraði í þeim leikjum 2 mörk. Gísli hefur verið öflugur með ÍA á undirbúningstímabilinu með fimm leiki spilaða og tvö mörk skoruð.

Spurningarnar: Hvernig mun ÍA spjara sig eftir að hafa misst kanónur úr leikmannahópnum? Hver mun skora mörkin? Verður varnarleikurinn traustari en í fyrra? Hvort verður Árni eða Dino í markinu?

Völlurinn: Norðurálsvöllurinn. Það er alltaf nostalgíufílingur að skella sér á Akranes og þegar sólin skín hentar brekkan ákaflega vel.

„Sóknin er stóra spurningamerkið í sumar"


Stuðningsmaðurinn segir - Brynjólfur Þór Guðmundsson
„Spáin kemur í sjálfu sér ekki á óvart miðað við umræðu um liðið og ef til vill frammistöðu í sumum leikjum á undirbúningstímabilinu, þar má þó hafa í huga að margir lykilmenn voru fjarverandi og ungir leikmenn fengu tækifæri til að spila. Það er auðvelt að spá liðinu bágu gengi og ef til vill erfiðara að vera bjartsýnn. Ég er samt áhyggjulaus fyrir tímabilið. Mínir menn verða kannski ekki Íslandsmeistarar en falla heldur ekki. Skagaliðið hefur misst mikið frá síðasta tímabili, stóran hluta af mörkunum og góða leikmenn. Við höfum ekki engið jafn stór nöfn á móti en nokkra menn sem styrkja liðið. Svo má ekki gleyma að ungu strákarnir eru árinu eldri og reyndari. Vörnin verður að öllum líkindum betri í ár en hún var í fyrra. Miðjan er þéttsetin góðum leikmönnum og þar er mesta breiddin hjá okkur. Sóknin er kannski stóra spurningamerkið í sumar."

Komnir
Alex Davey frá Tampa Bay Rowdies
Dino Hodzic frá Kára
Elias Tamburini frá Grindavík
Hákon Ingi Jónsson frá Fylki
Hrafn Hallgrímsson frá ÍR
Þórður Þorsteinn Þórðarson frá FH

Farnir
Bjarki Steinn Bjarkason til Venezia
Hlynur Sævar Jónsson í Víking Ó. (Á láni)
Marcus Johansson
Marteinn Theodórsson í Víking Ó. (Á láni)
Stefán Teitur Þórðarson til Silkeborg
Tryggvi Hrafn Haraldsson í Lilleström

Fyrstu fimm leikir ÍA:
30. apríl Valur - ÍA
8. maí ÍA - Víkingur
13. maí FH - ÍA
17. maí ÍA - Stjarnan
21. maí HK - ÍA

Sjá einnig:
Hin hliðin - Árni Snær Ólafsson
Hin hliðin - Eyþór Wöhler
Hin hliðin - Sindri Snær Magnússon

Leikmenn ÍA:
2 - Þórður Þ Þórðarson
3 - Óttar Bjarni Guðmundsson
4 - Aron Kristófer Lárusson
5 - Benjamin Mehic
6 - Jón Gísli Eyland Gíslason
7 - Sindri Snær Magnússon
8 - Hallur Flosason
9 - Viktor Jónsson
10 - Steinar Þorsteinsson
11 - Arnar Már Guðjónsson
12 - Árni Snær Ólafsson (m)
14 - Ólafur Valur Valdimarsson
15 - Leó Ernir Reynisson
16 - Brynjar Snær Pálsson
17 - Gísli Laxdal Unnarsson
18 - Elias Tamburini
19 - Ísak Snær Þorvaldsson
20 - Guðmundur Tyrfingsson
22 - Hákon Ingi Jónsson
23 - Ingi Þór Sigurðsson
25 - Sigurður Hrannar Þorsteinsson
26 - Eyþór Aron Whöler
27 - Árni Salvar Heimisson
29 - Hrafn Hallgrímsson
30 - Árni Marinó Einarsson
31 - Dino Hodzic (m)
44 - Alex Davey

Spámennirnir: Arnar Daði Arnarsson, Elvar Geir Magnússon, Guðmundur Aðalsteinn Ásgeirsson, Gunnar Birgsson, Hafliði Breiðfjörð, Ingólfur Sigurðsson, Magnús Már Einarsson, Sverrir Einarsson, Sæbjörn Þór Þórbergsson Steinke, Tómas Þór Þórðarson