„Stend við hvert orð"
Ljósvakapistillinn sem Kolbrún skrifaði.
„Fótboltamenn eru viðkvæmustu sálir sem maður finnur, þeir líta á þetta sem trúarbrögð" segir Kolbrún Bergþórsdóttir, blaðakona hjá Morgunblaðinu, en hún skrifaði fjölmiðlapistil sem birtist í morgun og hefur vakið hörð viðbrögð.
Í pistlinum furðar Kolbrún sig á viðbrögðum manna við því að Sir Alex Ferguson er að hætta sem knattspyrnustjóri Manchester United og segir að fótbolti „sé heldur ómerkilegur leikur þeirra sem ekki nenna að lesa bækur“.
Karlmenn sem búa í þröngum hugmyndaheimi og hafa takmarkað ímyndunarafl láta eins og knattspyrna sé upphaf og endir alls halda annað. Þeir vita ekki að knattspyrnustjóri er bara knattspyrnustjóri og skiptir engu sérstöku máli.
Sama hvað fólk segir um mig
„Ég vissi að þeir yrðu alveg brjálaðir, það má ekkert segja í þessu þjóðfélagi. Reyndar ofbauð mér hvernig fullorðnir karlmenn létu í sambandi við Ferguson," segir Kolbrún en Fótbolti.net heyrði í henni í dag.
„Þeir voru hágrenjandi allan daginn og ræddu þetta frá níu til fimm. Það var ekki vinnufriður fyrir karlmönnum sem voru í tilfinningalegu uppnámi. Ég er orðin mjög þreytt á þessu. Þeir ættu frekar að opna bók," segir Kolbrún.
Gott!
Netið hefur logað eftir pistilinn frá Kolbrúnu en þessi umræða hefur þó farið að mestu framhjá henni.
„Ég er aldrei á netinu og er ekki á Facebook. Svo er mér nákvæmlega sama hvað fólk segir um mig. Það var bara hringt í mig og sagt að allt væri orðið vitlaust. Ég sagði bara: Gott!"
„Ég ætla ekki að biðjast afsökunar, ég stend við hvert orð. Það verður að vera hasar og umræða í gangi. Aðalatriðið er að mér blöskraði að sjá karlmenn sem ég taldi vitiborna og mér fannst þetta ekki í lagi. Ég ráðlegg þeim að lesa bækur," segir Kolbrún.
Athugasemdir
