Sjá einnig:
Leikur í Svíþjóð í sumar - „Ótrúlega glöð að vera komin á þennan stað"
„Það er kannski ekkert venjulegt við það að fá fimm leiki nýorðin þrettán ára sem markvörður"
Minna spurt út í nafnið í dag
Hvaðan kemur nafnið Cecilía?

„Ef ég á að vera hreinskilin veit ég ekki af hverju ég heiti þetta því ég er ekki skírð í höfuðið á neinum og mamma og pabbi bæði íslensk þannig þetta er mjög góð spurning," sagði Cecilía.

„Ég held að ég fékk hana að meðaltali fimm sinnum á dag þegar ég var yngri en það er minna spurt mig út í þetta núna, kannski flestir vinir mínir bara búnir að venjast því."

Meiddist á pæjumótinu og var sett í markið
Hvenær og af hverju ákvað Cecilía að verða markvörður?

„Ég segi alltaf frá því þegar ég var á pæjumótinu í Eyjum og meiddist eitthvað smá þannig ég var sett í markið, svo stóð ég mig bara ágætlega og fannst mjög gaman þannig ég hélt því bara áfram."

Var hún í öðrum íþróttum?

„Nei, ég hef bara æft fótbolta ég mætti reyndar á eina körfuboltaæfingu en því miður varð ekkert úr því."

Fékk tækifærið hjá uppeldisfélaginu þrettán ára
Cecilía lék sína fyrstu meistaraflokksleiki sumarið 2017 og var svo í stærra hlutverki sumarið 2018. Hvernig var að stíga fyrstu skrefin með uppeldisfélaginu?

„Það kom mér frekar mikið á óvart þegar ég var tekin inn á meistaraflokksæfingar í nóvember 2016, þá nýorðin 13 ára. Þegar ég hugsa til baka er ég Júlla [Júlíus Ármann Júlíusson] þjálfara ótrúlega þakklát fyrir það að hafa leyft mér að æfa með þeim og að hafa tekið mig svona unga upp í meistaraflokk, það er alls ekkert sjálfgefið að fá það tækifæri."

„Eftir að hafa fengið að æfa með þeim um veturinn stefndi ég í rauninni alltaf á það að fá að spila og mætti á allar æfingar með það markmið að fá mínútur um sumarið. Svo þegar ég fékk loksins að spreyta mig með liðinu fannst mér það náttúrulegt og raunhæft skref á ferlinum."

„Það er kannski ekkert venjulegt við það að fá fimm leiki nýorðin þrettán ára sem markvörður, eins og ég kom inn á áðan verð ég Júlla alltaf þakklát fyrir þessa dýrmæta reynslu og tækifæri sem ég fékk með uppeldisfélaginu."

Var Cecilía ánægð með eigin frammistöður?

„Varðandi frammistöðu mína þessi sumur og þá sérstaklega 2018 þar sem ég var í meira aðalhlutverki þar, þá var ég bara nokkuð ánægð með eigin frammistöður en auðvitað vill maður alltaf gera betur en þannig verður þú líka betri."

„Ein besta ákvörðun sem ég hef tekið"
Af hverju fór Cecilía í Fylki fyrir tímabilið 2019?

„Eftir 2018 tímabilið hjá Aftureldingu fannst mér ég vera tilbúin í það að taka næsta skref. Helsta ástæðan fyrir því að ég valdi Fylki er sú að Steini markmannsþjálfarinn minn tók við markmannsþjálfun hjá meistaraflokkum félagsins. En aðrir þættir spiluðu líka inn í eins og umhverfi, þjálfarar og stefna félagsins, sem var að byggja upp og gefa ungum leikmönnum tækifæri til þess að vaxa og verða betri."

„Ég sé alls ekki eftir þeirri ákvörðun og ég myndi ráðleggja öllum ungum leikmönnum að komast í svona umhverfi eins og hjá Fylki því þetta var ein besta ákvörðun sem ég hef tekið."

Ef hún horfir á þessi tvö tímabil, er hún sátt við það sem hún náði að afreka og hvernig liðinu gekk?

„Ég er mjög stolt af liðinu þegar ég horfi til baka, sem nýliðar í deildinni enduðum við í 6. sæti ásamt því að tapa naumlega í undanúrslitum í bikar. Það tap var ótrúlega svekkjandi en gaf okkur bara auka innspýtingu inn í næstu leiki það sumar. Síðan náðum við besta árangri félagsins frá upphafi í fyrra sem var 3. sæti eftir mjög erfitt og krefjandi ár."

Líklega besta augnablikið á ferlinum
Cecilía spilaði sinn fyrsta A-landsleik fyrir um ári síðan. Hún kom fyrst inn í hópinn haustið 2019. Hvernig var að fá fyrsta kallið og spila fyrsta leikinn?

„Það er alltaf ótrúlegur heiður að vera valin í landsliðið og ég er þakklát Jón Þór [Haukssyni] og þjálfarateyminu að hafa tekið þá ákvörðun að velja mig í hópinn svona unga og síðan að gefa mér tækifæri í fyrra. Það var líklega besta mómentið á ferlinum hingað til að fá að spila fyrir Íslands hönd."

Hvernig horfir landsliðið við Cecilíu í dag?

„Auðvitað vilja allir spila fyrir Ísland en það eina sem ég get gert núna er að leggja hart af mér á hverjum degi og grípa svo þau tækifæri sem ég vonandi fæ."

Höfðu það ekki í sér að klára horfa á leikinn
Hvernig var að heyra lokaflautið í Ungverjalandi, vita að þetta væri sætið á EM væri komið langleiðina í hús? Og svo seinna um kvöldið þegar það var staðfest að þið færuð á EM?

„Það var geggjuð tilfinning að hafa klárað leikinn í Ungverjalandi en samt svolítið skrítið upp á það að nú værum við bara að bíða til þess að vita hvort við kæmumst beint á EM. Það skapaðist samt svo geggjuð stemning inn á fundarherbergi þegar við horfðum á hina leikina þar sem úrslitin þurftu að vera með okkur í liði."

„Ef ég man rétt höfðum við það ekki í okkur að klára leikinn þannig við fórum allar saman inn í matsal og gleðifréttirnar voru tilkynntar stutta síðar. Þannig þetta var bara geggjaður dagur í alla staði."

Cecilía á að baki einn A-landsleik og er í lansliðshópnum í komandi verkefni gegn Ítalíu.

Stundum þarf að klessa á vegg til að læra
Rauða spjaldið gegn Selfossi haustið 2019. Hvað gerðist? Sagði Cecilía eitthvað sem hún sér eftir?

„Eftir leik labba ég til dómaranna og í hreinskilni sagt man ég ekki upp á 10 hvað ég sagði en það var mjög saklaust, ég missti samt sem áður keppnisskapið aðeins frá mér og ég veit það núna að það er engin afsökun en stundum þarf maður að klessa á vegg til þess að læra."

Stór viðurkenning þrjú ár í röð
Cecilía var valin í lið ársins 2019, var það mikil innspýting? Kom henni á óvart hversu vel henni gekk á fyrsta tímabili í efstu deild? Cecilía var einnig valin efnilegust í 1. deildinni sumarið 2018 og efnilegust í Pepsi Max-deildinni 2020.

„Það er auðvitað mikil viðurkenning að vera valin af mótherjum í lið ársins en ég horfði mestmegnis á hana sem viðurkenningu fyrir liðið sem hjálpaði mér mjög mikið á mínu fyrsta tímabili í efstu deild og saman áttum við gott tímabil sem nýliðar."

„Það kom mér í raun og vera lítið á óvart en ég hefði samt aldrei getað það án þess að hafa fullt traust frá Kjartani [Stefánssyni] og Steina [Þorsteinn Magnússon] til þess að spila minn leik og fá að gera mín mistök en það er alls ekkert sjálfgefið að spila svona ungum markmanni hjá liði sem er nýliði í efstu deild og fyrir það verð ég ævinlega þakklát."

„Það er auðvitað alltaf gaman að fá viðurkenningu fyrir alla vinnuna sem maður leggur á sig en hún breytir í raun og veru engu fyrir mig."

Tígrisdýrabangsinn liggur í Fylkisklefanum
Hvernig gengur í jugglinu (halda hlutum á lofti), hefur Cecilía haldið því við?

„Mjög góð spurning! Ég æfði mig reglulega í þessu þegar covid ástandið var sem mest og var orðin allt í lagi í því en ég þarf að láta reyna á þetta aftur, þónokkuð síðan síðast því miður."

Að lokum, tígrisdýrabangsinn í viðtölum, hélt sú hefð áfram á síðustu leiktíð? Hver átti þá hugmynd í byrjun?

„Ég er í raun og veru ekki viss hver byrjaði á þessu en þetta var greinilega einhver hefð sem var í gangi áður en ég kom í Fylki en hætti því miður stuttu eftir. Ég held að enginn viti í raun ástæðuna, kannski var of mikil pressa að þurfa að annast lukkudýrið alveg fram að næsta leik."

„Ef ég þekki sektarstjórann okkar rétt var risa sekt fyrir að týna honum. Hann liggur núna einhversstaðar inni í klefa greyið," sagði Cecilía að lokum.

Athugasemdir