Spáin fyrir enska - 19. sæti: „Faðir tími hefur víst klukkað hann"

Um Sheffield United: Félagið þurfti ekki að bíða lengi eftir því að komast aftur upp í deild þeirra bestu, allavega ekki eins og lengi og síðast - langt því frá. Félagið var uppi tímabilið 2006-07 og fór svo niður. Liðið flakkaði í kjölfarið á milli B- og C-deildar en komst svo aftur upp í úrvalsdeild 2019 og lék þá í efstu deild í tvö tímabil í röð.

Liðið féll en þurfti aðeins að leika tvö tímabil til að komast aftur upp á staðinn sem allir vilja vera á. Sheffield United var langnæstbesta lið Championship-deildarinnar og komst verðskuldað upp.

Núna er spurning hvort Sheffield United nái að búa til einhver stöðugleika og nái mögulega að halda sér lengur uppi en síðast.

Stjórinn: Chris Wilder er ekki lengur í brúnni, það er fyrrum aðstoðarmaður hans, Paul Heckingbottom. Hann tók fyrst við liðinu til bráðabirgða eftir að Wilder yfirgaf félagið í mars 2021. Heckingbottom er því með nokkra reynslu úr ensku úrvalsdeildinni en liðið féll undir hans stjórn. Heckingbottom fékk fyrst ekki starfið en hann tók aftur við til bráðabirgða á fyrra tímabili liðsins í Championship-deildinni eftir fallið. Hann fékk svo starfið til frambúðar og hefur í kjölfarið gert flotta hluti. Heckingbottom, sem er fyrrum stjóri Barnsley, Leeds og Hibernian, en hann notast við þriggja manna varnarlínu í sínu kerfi. Sheffield United var eitt besta varnarlið Championship-deildarinnar í fyrra og Heckingbottom þarf að halda þeim einkennum í leik liðsins.

Leikmannaglugginn:
Eins og hjá Luton, liðinu sem er spáð neðsta sæti, þá hefur leikmannaglugginn verið heldur rólegur hingað til hjá Sheffield United. Aðeins þrír nýir leikmenn hafa komið inn fyrir samanlagt 6,3 milljónir punda. Þau stóru tíðindi bárust í glugganum að Billy Sharp yrði ekki áfram hjá félaginu. Sharp er 37 ára framherji sem kom upp í gegnum unglingastarfið hjá Stálstrákunum og er hann goðsögn hjá félaginu.

Komnir:
Bénie Traoré frá Häcken - 4 milljónir punda
Anis Slimane frá Bröndby - 2,3 milljónir punda
Yasser Larouci frá Troyes - á láni

Farnir:
Enda Stevens - samningur rann út
Kyron Gordon - samningur rann út
Jack O’Connell - samningur rann út
Billy Sharp - samningur rann út

Út frá leikmannaglugganum þá er líklegt byrjunarlið svona:



Lykilmenn: Það er mikið högg fyrir Sheffield United að missa Iliman Ndiaye til Marseille í Frakklandi, en hann var einn besti leikmaður liðsins á síðustu leiktíð. Sander Berge er líklega besti leikmaður Sheffield United en hann er mjög sterkur miðjumaður. Miðvörðurinn John Egan er mikilvægur en hann er fyrirliði og er með reynslu úr þessari deild. Þá verður liðið að treysta á skoska sóknarmanninn Oli McBurnie en það er hættulegur leikur þar sem hann hefur aldrei skorað mikið í ensku úrvalsdeildinni. Síðast þegar hann lék í deildinni þá skoraði hann eitt mark í 23 leikjum, en félagið þarf helst að kaupa sóknarmann.

„Stálstrákarnir ættu að geta staðið sig með prýði"
Íþróttafréttamaðurinn Runólfur Trausti Þórhallsson heldur upp á Sheffield United. Við fengum hann til að svara nokkrum spurningum tengdum liðinu.

Ég byrjaði að halda með Sheffield United af því að (frá 2020... Í grunninn er maður náttúrulega Manchester United stuðningsmaður fyrst og fremst en í gegnum árin – þökk sé Football Manager – hefur maður kynnst ótrúlegustu liðum og ég er nokkuð viss um að síðasta áratug hafi ég alltaf tekið alla vega eitt „save“ með Sheffield United. Þannig á endanum fór maður að fylgjast með liðinu ár hvert, sama hversu illa hefur gengið. Svo ætli ég hafi ekki byrjað að fylgjast með þeim vegna Football Manager.

Áttu uppáhalds minningu tengda félaginu þínu? Þegar Sheffield vann Arsenal 1-0 árið 2006. Phil Jagielka þurfti að henda sér í rammann eftir Paddy Kenny, sá mæti maður, hafði meiðst. Þvílíkur leikur.

Hvernig fannst þér síðasta tímabil? Augljóslega frábært, 91 stig í Championship er afrek þó svo að lærisveinar Vincent Kompany hafi brotið 100 stiga múrinn.

Ertu með einhverja sérstaka leikdagshefð? Það er ekki hægt í Championship, alltof margir leikdagar.

Hvern má ekki vanta í liðið? Hér ætti maður að segja Billy Sharp en faðir tími hefur víst klukkað hann. Sander Berge skuldar gott tímabil í efstu deild.

Hver er veikasti hlekkurinn? Rhian Brewster, sá er ÖMURLEGUR.

Þessum leikmanni á að fylgjast með... Anel Ahmedhodzic er miðvörður frá Bosníu-Hersegóvínu en alinn upp í Svíþjóð. Hann er 24 ára gamall og gæti átt framtíðina fyrir sér. Menningarlegur hafsent af gamla skólanum en Football Manager nördar þekkja þennan leikmann býsna vel.

Við þurfum að kaupa... Illa vegið að manni sem hélt 18x hreinu í Champ á síðustu leiktíð en ég væri til í nýjan markvörð. Skilst að David de Gea sé laus.

Hvað finnst þér um stjórann? Paul Heckingbottom hefur nýtt tækifærið vel eftir hörmungarbyrjun. Þekkir DNA félagsins og á skilið að stýra liðinu í Prem.

Hvernig líður þér fyrir tímabilinu sem er framundan? Allt í lagi bara. Nóg af liðum sem voru gjörsöm hörmung á síðustu leiktíð svo Stálstrákarnir ættu að geta staðið sig með prýði.

Hvar endar liðið? Sættum okkur við 17. sæti en lendum í 15. sæti.

Sheffield United hefur leik í ensku úrvalsdeildinni laugardaginn 12. ágúst gegn Crystal Palace á heimavelli.

---

Þau sem spáðu: Alexandra Bía Sumarliðadóttir, Aksentije Milisic, Anton Freyr Jónsson, Arnar Laufdal Arnarsson, Brynjar Ingi Erluson, Elíza Gígja Ómarsdóttir, Elvar Geir Magnússon, Guðmundur Aðalsteinn Ásgeirsson, Jóhann Þór Hólmgrímsson, Ívan Guðjón Baldursson, Stefán Marteinn Ólafsson og Sverrir Örn Einarsson.

Liðin fengu eitt stig og upp í 20 eftir það hvar hver og einn spáði þeim. Liðið í síðasta sæti fékk eitt stig, liðið í 19. sæti tvö stig og koll af kolli. Stigin í spánni tengjast á engan hátt stigafjölda liðanna í deildinni..

Spáin:
1. ?
2. ?
3. ?
4. ?
5. ?
6. ?
7. ?
8. ?
9. ?
10. ?
11. ?
12. ?
13. ?
14. ?
15. ?
16. ?
17. ?
18. ?
19. Sheffield United, 31 stig
20. Luton Town, 16 stig