Kári og KFK áttust við í eina leik kvöldsins í 3. deild karla og úr varð heilmikil skemmtun, þar sem heimamenn í Kára komust í þriggja marka forystu á fyrstu 20 mínútum leiksins.

Björgvin Stefánsson svaraði með marki fyrir KFK en fékk að líta beint rautt spjald nokkru síðar. Staðan var 4-1 fyrir heimamenn í hálfleik á Akranesi og voru gestirnir frá Kópavogi leikmanni færri.

Hektor Bergmann Garðarsson, sonur Garðars Bergmanns Gunnlaugssonar sem gerði frábæra hluti með ÍA og Norrköping á sínum fótboltaferli, gerði sér lítið fyrir og skoraði þrennu til þess að stinga gestina af.

Staðan var orðin 6-2 eftir að Hektor fullkomnaði þrennuna sína en Sigurður Gísli Bond Snorrason kom inn af bekknum á 76. mínútu og tókst að skora síðasta mark leiksins í 7-3 tapi.

Kári fer upp í annað sæti deildarinnar með þessum sigri, þar sem liðið er með 10 stig eftir 5 umferðir.

KFK er í neðri hlutanum með 6 stig.